काठमाण्डौँ – उपप्रधान एवं अर्थमन्त्री विष्णुप्रसाद पौडेलले अर्थतन्त्रका सूचक विस्तारै सकारात्मक हुँदै गएको बताएका छन् । वर्तमान सरकार गठनयता अर्थतन्त्रका बाह्य सूचक विस्तारै सकारात्मक हुँदै गएको उनले बताएका हुन् ।
आइतबार नेपाल आर्थिक पत्रकार समाज (सेजन)को २६औँ वार्षिक साधारणसभामा उनले सरकारले निजी क्षेत्रमैत्री नीति ल्याएका कारण पुँजी बजार, रियलस्टेट ऋण प्रवाह बढ्दै गएको उल्लेख गरे ।
अर्थतन्त्र थप सुधारका निम्ति विभिन्न क्षेत्रबाट सुझाव लिएर अघि बढ्न सरकार तयार रहेको उनले बताए । “केही समयअघि निकै खराब अवस्थामा पुगेको मुलुकको अर्थतन्त्र सरकारको हस्तक्षेपबाटै अहिलेको सहज अवस्थामा आएको हो,” उनले भने ।
आफूले चाहेजसरी अर्थतन्त्रको शिथिलता कम नभएको उनले बताए । सरकारको हस्तक्षेप पर्याप्त नभएको हो कि भन्ने लागेको उनको भनाइ थियो ।
मुलुकको अर्थतन्त्र बिग्रनुमा राजनीतिक अस्थिरता मुख्य कारण रहेको उनले उल्लेख गरे । “एक वर्षमा तीनजना अर्थमन्त्रीसँग सहकार्य गरेको सेजन अध्यक्षले भन्नुभयो । यसको समाधानको लागि अब स्थिर सरकार आएको छ,” उनले भने, “निजी क्षेत्रले गुनासो गर्न छाडेर विकास र समृद्धिको सरकारको यात्रामा सघाउनुपर्छ ।”
चालु आर्थिक वर्षका निम्ति नेपाल राष्ट्र बैंकले ल्याएको मौद्रिक नीति तुलनात्मक रूपमा लचिलो र अर्थतन्त्रका समस्या समाधान गर्न केन्द्रित रहेको अर्थमन्त्री पौडेलले बताए ।
राष्ट्र बैंकका गभर्नर महाप्रसाद अधिकारीले मुलुकको अर्थतन्त्र र मौद्रिक तथा वित्तीय सूचक सहज बन्दै गएको तथ्यांकले देखाएको बताए । “बाह्य क्षेत्र सहज हुँदै गएको छ । मुद्रास्फीति घटेको छ । बैंक तथा वित्तीय संस्थामा तरलता बढेको छ । अटोमोबाइल र पुँजीबजारलगायत क्षेत्र चलायमान हुँदै गएको छ,” उनले भने ।
नेपाल उद्योग वाणिज्य महासंघका अध्यक्ष चन्द्रप्रसाद ढकालले बैंक तथा वित्तीय संस्थासम्बन्धी ऐन (बाफिया)लाई संशोधन गर्न बनेको विधेयकका व्यवस्था निजी क्षेत्रमैत्री नरहेको बताए । बाफिया विधेयकले बैंक तथा वित्तीय संस्थाका संस्थापक लगानीकर्ताले अरू क्षेत्रमा लगानी गर्न समस्या सिर्जना गर्न सक्ने उनको भनाइ थियो ।
“बाफिया विधेयकले बैंक तथा वित्तीय संस्थामा संस्थापक र ऋणी छुट्ट्याउनुपर्ने भन्ने व्यवस्था संशोधनीय छ,” ढकालले भने, “अख्तियार र सतर्कता केन्द्रले निजी क्षेत्रको नियमन अनुगमन गर्ने व्यवस्था ल्याउँदा त्यसले थप समस्या पार्छ ।”
निर्माण व्यवसायीले सरकारबाट पाउनुपर्ने भुक्तानी चाँडो गरिनुपर्ने, भारतसँगका सीमानाकामा हुने अवैध आयात तथा कारोबार रोकिनुपर्ने, भारतीय पर्यटकले नेपालमा बोक्न मिल्ने नगदसम्बन्धी व्यवस्था थप लचिलो बनाइनुपर्नेमा उनले जोड दिए ।
नेपाल उद्योग परिसंघका अध्यक्ष राजेशकुमार अग्रवालले मुलुकको अर्थतन्त्र सुधारोन्मुख रहे पनि आन्तरिक उत्पादन तथा माग बढ्न नसकेको बताए । “बाह्यक्षेत्र सन्तुलनमा छ । बजारमा तरलता पर्याप्त छ । ब्याजदर पनि घटेको छ । तर, अहिले आयात र निर्यात घेटेको छ । यसको अर्थ बजारमा माग बढ्न सकेको छैन भन्ने हो,” अध्यक्ष अग्रवालले भने ।
सेजनका संस्थापक अध्यक्ष प्रतीक प्रधानले जुन सोचले संस्था सुरु गरियो, सोहीअनुसार अघि बढेकामा खुसी व्यक्त गरे । “हामीले सेजन सुरु गर्दा जुन उद्देश्यले गरेका थियौँ, सोहीअनुसार अघि बढेको छ । हालका अध्यक्षसम्म आइपुग्दा संस्था झन् बलियो भएर गएको छ,” उनले भने, “कतिपय अवस्थामा यसमा गलत तत्त्व हावी हुँदै गएको भन्ने आरोप लागेको छ, यसमा भने सेजन चनाखो हुनुपर्छ । ”
सबै व्यक्तिमा राजनीतिक आस्था भए पनि संस्था र समाचारमा त्यो देखाउन नहुने प्रधानले बताए ।
