काठमाडौं – साताको दोस्रो कारोबार दिन नेप्से परिसूचक बढेर बन्द भएको छ। पछिल्लो दुई कारोबार दिनदेखि उकालो लागेको नेप्सेले आज पनि सोही गतिलाई निरन्तरता दिएको हो।
आज नेप्से परिसूचक १७.५६ अंक बढेर २०६३.८३ विन्दुमा पुगेको छ। त्यसैगरी, सेन्सेटिभ इण्डेक्स ०.८८ अंक बढेको छ भने फ्लोट इण्डेक्स १.६१ अंक र सेन्सेटिभ फ्लोट इण्डेक्स १.२८ अंक बढेको छ।
नेप्से बढेपनि यस दिन कारोबार रकम भने घटेको छ। अघिल्लो कारोबार दिन ४ अर्बभन्दा बढीको शेयर खरिदबिक्री भएको बजारमा यस दिन २५३ स्टकको ४८ हजार ५०३ पटकको कारोबारमा २ अर्ब ९६ करोड ९ लाख २७ हजार रुपैयाँ बराबरको ८२ लाख ७१ हजार कित्ता शेयर खरिदबिक्री भएको छ।
सोमबार ४ कम्पनीको शेयर सकारात्मक सर्किट लेभलमा कारोबार भएको छ। आज धौलागिरी लघुवित्त वित्तीय संस्था, श्रृजनशील लघुवित्त वित्तीय संस्था, खप्तड लघुवित्त वित्तीय संस्था र अजोड इन्स्योरेन्सको शेयरमूल्य सर्किट लेभलमा कारोबार भएको हो। त्यस्तै, यस दिन प्रभु इन्स्योरेन्सको शेयरमूल्य ९ प्रतिशत बढेको छ। यस दिन ५५ स्टकको मूल्य घटेको छ।
कारोबार रकमका आधारमा आज नबिल बैंक शीर्ष स्थानमा रहेको छ। सो बैंकको १६ करोड ८४ लाख रुपैयाँ बराबरको शेयर कारोबार भएको छ। त्यसैगरी, हिमालयन डिष्टिलरीको १६ करोडभन्दा बढीको शेयर कारोबार भएको छ भने एनआईसी एशियाको ११ करोडभन्दा बढीको शेयर खरिदबिक्री भएको छ।
१३ उपसमूहमध्ये आज १० उपसमूहको परिसूचक बढेको छ भने ३ उपसमूहको परिसूचक घटेको छ। व्यापार उपसमूहको परिसूचक सर्वाधिक ३.५२ प्रतिशत बढेको छ। त्यसैगरी, यस दिन निर्जीवन बीमा उपसमूहको परिसूचक ३ प्रतिशतभन्दा बढी बढेको छ भने होटल तथा पर्यटन उपसमूहको करिब ३ प्रतिशत बढेको छ। यस दिन उत्पादन तथा प्रशोधन, म्युचुअल फण्ड र अन्य उपसमूहको परिसूचक घटेको हो।
