काठमाडौं- आज नेप्से परिसूचक सामान्य अंक बढेर बन्द भएको छ। पछिल्लो ४ कारोबार दिनदेखि निरन्तर ओरालो लागिरहेको नेप्से, आज भने बढेको हो।
आज नेप्से परिसूचक १.१५ अंक बढेर १८५८.८९ विन्दुमा पुगेको छ। त्यसैगरी, सेन्सेटिभ इण्डेक्स १.१५ अंक बढेको छ भने फ्लोट इण्डेक्स ०.२४ अंक र सेन्सेटिभ फ्लोट इण्डेक्स ०.१७ अंक बढेको छ।
नेप्से उकालो लागेपनि कारोबार रकम भने घटेको छ। अघिल्लो कारोबार दिन १ अर्ब भन्दा बढीको शेयर खरिदबिक्री भएको बजारमा आज २५१ स्टकको ३० हजार ५४५ पटकको कारोबारमा ८८ करोड ६० लाख ९८ हजार रुपैयाँ बराबरको २६ लाख ९९ हजार कित्ता शेयर खरिदबिक्री भएको छ।
सोमबार धौलागिरी लघुवित्तको शेयर सकारात्मक सर्किट लेभलमा कारोबार भएको छ। सो लघुवित्तको शेयरमूल्य ४९ रुपैयाँ ६० पैसा बढेर ५४५ रुपैयाँ ७० पैसामा अन्तिम कारोबार भएको छ। त्यसैगरी, खप्तड लघुवित्तको शेयरमूल्य ६ प्रतिशतभन्दा बढी बढेको छ भने सिवाईसी लघुवित्तको शेयरमूल्य करिब ६ प्रतिशत बढेको छ। कारोबारमा आएको इष्टर्न हाइड्रोपावरको शेयरमूल्य सर्वाधिक ७.९७ प्रतिशत घटेको छ। त्यस्तै, ग्लोबल आइएमई ब्यालेन्स्ड फण्ड १ को इकाईमूल्य ७.१२ प्रतिशत घटेको छ भने फरवार्ड माइक्रोफाइनान्स र पिपुल्स पावरको शेयरमूल्य ६ प्रतिशतभन्दा बढी घटेको छ।
कारोबार रकमका आधारमा आज प्राइम कमर्सियल बैंक शीर्ष स्थानमा रहेको छ। सो बैंकको ६ करोड ९३ लाख ४३ हजार रुपैयाँ बराबरको शेयर खरिदबिक्री भएको छ। त्यसैगरी, फरवार्ड माइक्रोफाइनान्सको करिब साढे ५ करोडको शेयर कारोबार भएको छ भने हिमालयन डिष्टिलरीको ४ करोडभन्दा बढीको शेयर किनबेच भएको छ।
आज १३ उपसमूहमध्ये ९ उपसमूहको परिसूचक बढेको छ भने बाँकी ४ उपसमूहको परिसूचक घटेको छ। अन्य उपसमूहको परिसूचक सर्वाधिक १.९५ प्रतिशत बढेको छ। अन्य उपसमूहको परिसूचकको वृद्धिदर १ प्रतिशतभन्दा कम रहेको छ। बैंकिङ्ग, जलविद्युत, लघुवित्त र व्यापार उपसमूहको परिसूचक घटेका हुन्।
