आज नेप्से परिसूचक घटेर बन्द भएको छ

काठमाडौं-  साताको दोस्रो कारोबार दिन आज नेप्से परिसूचक घटेर बन्द भएको छ। आइतबार सार्वजनिक भएको मौद्रिक नीतिको पहिलो त्रैमासिक समीक्षापश्चात बढ्ने अपेक्षा गरिएको बजार त्यसको विपरित घट्न पुग्यो।

मीक्षाले बैंक तथा वित्तीय संस्थाहरुको स्प्रेड दर घटाएको छ। यसले कर्जाको ब्याजदर घट्ने देखिन्छ। यसका साथै केन्द्रिय बैंकले सिडि रेशियोमा पनि लचकता अपनाउने संकेत दिएको छ। यस अनुसार लगानीकर्ताहरुले आजको बजार बढ्ने अपेक्षा गरेका थिए। तर,आज भने बजार नकारात्मक भएर बन्द भयो।आजको बजार घटाईलाई लगानीकर्ताहरुले करेक्सनको रुपमा लिएका छन्।

सोमबार नेप्से परिसूचक १५.६१ अंक घटेर १९५०.३७ विन्दुमा झरेको छ। त्यसैगरी, आज सेन्सेटिभ इण्डेक्स ३.६५ अंक घटेको छ भने फ्लोट इण्डेक्स १ अंक र सेन्सेटिभ फ्लोट इण्डेक्स १.०९ अंक घटेको छ।

नेप्सेसँगै कारोबार रकम पनि घटेको छ। अघिल्लो कारोबार दिन २ अर्बभन्दा बढीको कारोबार भएको बजारमा आज २३६ स्टकको २४ हजार ९५१ पटकको कारोबारमा १ अर्ब ४९ लाख ४३ हजार रुपैयाँ बराबरको ३७ लाख ६१ हजार कित्ता शेयर खरिदबिक्री भएको छ।

यस दिन खप्तड लघुवित्तको शेयरमूल्य सर्वाधिक ८.१८ प्रतिशत बढेको छ। त्यसैगरी, गरिमा विकास बैंकको ऋणपत्र र नेपाल ल्यूब आयलको शेयरमूल्य ६ प्रतिशतभन्दा बढी बढेको छ। यस दिन सिनर्जी पावर र ओरियन्टल होटलको शेयरमूल्य ४ प्रतिशतभन्दा बढी घटेको छ।

कारोबार रकमका आधारमा आज हिमालयन डिष्टिलरी शीर्ष स्थानमा रहेको छ। सो कम्पनीको  १६ करोड ४६ लाख रुपैयाँ बराबरको शेयर खरिदबिक्री भएको छ। त्यसैगरी, नबिल बैंकको ७ करोडभन्दा बढीको शेयर कारोबार भएको छ भने शिवम् सिमेन्ट्सको ६ करोडभन्दा बढीको शेयर किनबेच भएको छ।

१३ उपसमूहमध्ये यस दिन म्युचुअल फण्ड र व्यापार उपसमूहको परिसूचक बढेको छ भने बाँकी ११ उपसमूहको परिसूचक घटेको छ। यस दिन विकास बैंक, वित्त, जलविद्युत, उत्पादन तथा प्रशोधन र अन्य उपसमूहको परिसूचक १ प्रतिशतभन्दा बढी घटेको छ।