काठमाडौं- आज नेप्से २.६१ अंक घटेर १८५८.३३ विन्दुमा झरेको छ। सेन्सेटिभ इण्डेक्स ०.२० अंक बढेको छ भने फ्लोट इण्डेक्स ०.१८ अंक र सेन्सेटिभ फ्लोट इण्डेक्स ०.०१ अंक घटेको छ।
नेप्सेसँगै कारोबार रकम पनि घटेको छ। आइतबार ८० करोडभन्दा बढीको शेयर खरिदबिक्री भएको बजारमा २१९ स्टकको १३ हजार ६०९ पटकको कारोबारमा ५१ करोड ५८ लाख १८ हजार रुपैयाँ बराबरको १६ लाख ३१ हजार कित्ता शेयर कारोबार भएको छ।
नेप्से ओरालो लागेपनिदुई स्टकको शेयर सकारात्मक सर्किट लेभलमा कारोबार भएको छ। अभियान लघुवित्त वित्तीय संस्था र सयपत्री हाइड्रोपावरको शेयर सकारात्मक सर्किट लेभलमा कारोबार भएको छ। अन्य स्टकहरुको मूल्य वृद्धिदर भने ४ प्रतिशतभन्दा कम रहेको छ।
आज एक स्टकको शेयर भने नकारात्मक सर्किट लेभलमा कारोबार भएको छ। यस दिन पिपुल्स पावर कम्पनीको शेयरमूल्य ९.९७ प्रतिशत घटेर २३० रुपैयाँ २० पैसामा अन्तिम कारोबार भएको हो।
कारोबार रकमका आधारमा नबिल बैंक शीर्ष स्थानमा रहेको छ। सो बैंकको यस दिन २ करोड ७९ लाख रुपैयाँ बराबरको शेयर कारोबार भएको छ। त्यस्तै, प्रभु बैंकको २ करोड ६१ लाखको शेयर खरिदबिक्री भएको छ भने रिडी हाइड्रोपावरको २ करोड २६ लाख रुपैयाँ बराबरको शेयर किनबेच भएको छ।
सोमबार १३ उपसमूहमध्ये ६ उपसमूहको परिसूचक बढेको छ भने बाँकी ७ उपसमूहको परिसूचक घटेको छ। बैंकिङ्ग, होटल तथा पर्यटन, म्युचुअल फण्ड, निर्जीवन बीमा, अन्य र व्यापार उपसमूहको परिसूचक बढेको छ भने बाँकी उपसमूहको परिसूचक घटेको छ। घटेका ७ उपसमूहमध्ये वित्त उपसमूहको परिसूचक सर्वाधिक १.१० प्रतिशत घटेको छ।
