काठमाडौं – बिहीबार नेप्से परिसूचक सामान्य अंक घटेर बन्द भएको छ। कारोबारमा आएका २७७ स्टकमध्ये १३९ स्टकको मूल्य बढ्दा पनि नेप्से घटेर बन्द भएको छ। नेप्से परिसूचक २.१३ अंक घटेर १९३७.७४ विन्दुमा झरेको छ। मध्यान्हपछि अधिकांश समय सकारात्मक रहेको नेप्से, अन्तिम समयमा घटेर बन्द भएको हो। त्यसैगरी, सेन्सेटिभ इण्डेक्स ०.५४ अंक र फ्लोट इण्डेक्स ०.०८ अंक घटेको छ भने सेन्सेटिभ फ्लोट इण्डेक्स ०.०२ बढेको छ।
नेप्से घटेपनि यस दिन कारोबार रकम भने अघिल्लो दिनको तुलनामा बढेको छ।२२७ स्टकको २२ हजार १७६ पटकको कारोबारमा १ अर्ब ४ करोड ४४ लाख ४० हजार रुपैयाँ बराबरको ३४ लाख १ हजार कित्ता शेयर खरिदबिक्री भएको छ।
१३९ स्टकको मूल्य बढेपनि वृद्धिदर भने कम रहेको छ। ग्लोबल आइएमई लघुवित्त र मल्टीपर्पस फाइनान्स कम्पनीको शेयरमूल्य ४ प्रतिशतभन्दा बढी बढेको छ। कारोबारमा आएको सामुदायिक लघुवित्तको शेयरमूल्य सर्वाधिक साढे ६ प्रतिशत घटेको छ। त्यस्तै, अपर हेवाखोला हाइड्रोपावरको शेयरमूल्य यस दिन साढे ५ प्रतिशत घटेको छ।
कारोबार रकमका आधारमा यस दिन हिमालयन एभरेष्ट इन्स्योरेन्स शीर्ष स्थानमा रहेको छ। सो इन्स्योरेन्सको १३ करोड १० लाख रुपैयाँ बराबरको शेयर खरिदबिक्री भएको छ। त्यसैगरी, रिडी पावरको यस दिन करिब साढे ४ करोडको शेयर किनबेच भएको छ।
१३ उपसमूहमध्ये ६ उपसमूहको परिसूचक बढेको छ भने बाँकी ७ उपसमूहको परिसूचक घटेको छ। वित्त उपसमूहको परिसूचक सर्वाधिक १.३७ प्रतिशत बढेको छ भने विकास बैंक उपसमूहको परिसूचक १ प्रतिशतभन्दा बढी बढेको छ। यता अन्य उपसमूहको परिसूचक सर्वाधिक १.३३ प्रतिशत घटेको छ।
