काठमाण्डौं – आज नेप्से परिसूचक ५.९१ अंक घटेर २०५६.८८ विन्दुमा झरेको छ। त्यसैगरी, सेन्सेटिभ इण्डेक्स १.६८ अंक घटेको छ भने फ्लोट इण्डेक्स ०.४० अंक र सेन्सेटिभ फ्लोट इण्डेक्स ०.७० अंक घटेको छ।
नेप्सेसँगै कारोबार रकम पनि घटेको छ। पछिल्लो समय दैनिक औषतमा २ अर्बभन्दा बढीको शेयर कारोबार भइरहेको बजारमा यस दिन २१८ स्टकको ३६ हजार १३४ पटकको कारोबारमा १ अर्ब ९३ करोड ५५ लाख रुपैयाँ बराबरको ४६ लाख ४० हजार कित्ता शेयर खरिदबिक्री भएको छ।
नेप्से ओरालो लागेपनि यस दिन हिमालयन हाइड्रोपावरको शेयर सकारात्मक सर्किट लेभलमा कारोबार भएको छ। हालै मात्र सूचीकृत भइ कारोबारमा आएका कारण कम्पनीको शेयरमूल्य बढेको हो। सो कम्पनीको शेयरमूल्य २७ रुपैयाँ ५० पैसा बढेर ३०३ रुपैयाँ ३० पैसामा अन्तिम कारोबार भएको छ। त्यसैगरी, युनिलिभर नेपालको शेयरमूल्य ४ प्रतिशतभन्दा बढी बढेको छ।
मर्जरपश्चात कारोबारमा आएको हिमालयन एभरेष्ट इन्स्योरेन्सको शेयर भने यस दिन नकारात्मक सर्किट लेभलमा कारोबार भएको छ। सो इन्स्योरेन्सको शेयरमूल्य ५० रुपैयाँ ९८ पैसा घटेर ४५९ रुपैयाँ ५० पैसामा अन्तिम कारोबार भएको हो।
कारोबार रकमका आधारमा नागरिक लगानी कोष शीर्ष स्थानमा रहेको छ। सो कम्पनीको १० करोड ६८ लाख रुपैयाँभन्दा बढीको शेयर कारोबार भएको छ। त्यसैगरी, शिवम् सिमेन्ट्स, हिमालयन डिष्टिलरी र नबिल बैंकको ६ करोडभन्दा बढीको शेयर कारोबार भएको छ।
१३ उपसमूहमध्ये लगानी उपसमूहको परिसूचक ०.६९ प्रतिशत र उत्पादन तथा प्रशोधनको ०.५० प्रतिशत बढेको छ। बाँकी ११ उपसमूहको परिसूचक यस दिन घटेको छ। जसमध्ये व्यापार उपसमूहको परिसूचक सर्वाधिक १.४९ प्रतिशत घटेको छ।
