काठमाडौं- नेपालमा कोभिड–१९ महामारीसँगै ठप्प हुन पुगेको पर्यटन व्यवसायमा सक्रियता बढेसँगै चिनियाँ पर्यटकको आगमनमा बृद्दी आएको छ । पछिल्लो समय उत्साहजनक ढंगले चिनियाँ पर्यटकहरु नेपाल भित्रिन थालेको पाइएको छ । गत जुलाईमा जुनको तुलनामा २५० प्रतिशतभन्दा धेरैले चिनियाँ पर्यटकको आगमन बढेको तथ्यांक सार्वजनिक भएको हो ।
गएको जुनमा ४५१ चिनियाँ पर्यटक नेपाल भ्रमणमा आएका थिए । जुलाईमा बढेर १ हजार ५९३ पुगेको छ । यसपालि जुलाईको आगमन कोरोना महामारी शुरू हुनुअघिको जुलाईको तुलनामा भने ८५ दशमलव ३ प्रतिशतले कम हो । सन् २०१९ को जुलाईमा १० हजार ८०८ चिनियाँ नेपाल आएका थिए ।
चीनले कोरोना संक्रमण रोक्नका लागि गरेको बन्दाबन्दी खुकुलो गर्न थालेसँगै चिनियाँहरू विदेश भ्रमणमा निस्कन थालेका हुन् । यद्यपि चीनका केही शहरहरूमा अझै बन्दाबन्दी कायम छ । अन्तरराष्ट्रिय सञ्चारमाध्यमका अनुसार चीनको दक्षिणी पर्यटकीय शहर सान्या, नोवेल कोरोना भाइरसको उद्गमस्थल वुहानलगायतमा बन्दाबन्दी कायमै छ।
तर, लगभग सबै चिनियाँले कोरोनाविरुद्ध खोप लगाइसकेकाले यो बन्दाबन्दी शुरूताकाको जस्तो कठोर भने छैन । नेपालमा चिनियाँ र भारतीय पर्यटकको आगमनलाई अर्थपूर्ण मानिन्छ । पर्यटन क्षेत्रको दिगो प्रगतिका लागि भारतीय र चिनियाँ पर्यटकले अरूले भन्दा बढी योगदान गर्ने यस क्षेत्रका व्यवसायी बताउँछन् ।
चीन र भारत विश्वकै सबैभन्दा बढी जनसंख्या भएका मुलुक हुन् । चीनको जनसंख्या १ अर्ब ४० करोड हाराहारी छ । नेपाल आउन भिसा नचाहिने भारतको जनसंख्या पनि चीनकै हाराहारीमा रहेको छ । यी दुवै मुलुकका नागरिक वर्षेनि करोडौंको संख्यामा विदेश घुम्न निस्कन्छन् । भारत र चीनबाट विदेश घुम्न निस्कनेको सानो अंश मात्रै नेपाल ल्याउन सके पनि नेपाली पर्यटन क्षेत्रले ठूलो फड्को मार्न सक्ने बताइन्छ ।
कतिपय जानकारहरू त भारतीय र चिनियाँ पर्यटक ल्याउन सके अन्य मुलुकका नआए पनि फरक नपर्ने बताउँछन् ।
चिनियाँ र भारतीय पर्यटकका लागि नेपाल नजिकको र कम खर्चिलो गन्तव्य पनि हो । यी दुवै मुलुकबाट खर्चालु पर्यटक पनि उल्लेख्य संख्यामा विदेश घुम्न जान्छन् ।
नेपालमा आउने पर्यटक सबैभन्दा धेरै भारतीय हुन्छन् । दोस्रोमा चिनियाँ पर्छन् । तर, कोरोना भाइरससँगै चीनबाट आउने पर्यटकको संख्या न्यून देखिन थालेको थियो । यसपालि जुलाईमा आगमन संख्यामा उल्लेख्य सुधार देखिएसँगै अब चिनियाँ पर्यटक नेपालमा आउने क्रम बढ्ने व्यवसायीहरूको आकलन छ ।
