काठमाडौं – बजेट पछिको लगातार दोस्रो कारोबार दिन पनि सेयर बजारमा गिरावट भएको छ । आइतबार आगामी आर्थिक वर्ष २०७९-८० को बजेट सार्वजनिक भएसँगै कारोबार भएका दुवै दिने नेप्सेम गिरावट भएको छ । आगममी आथिर्टक वर्षको बजेट आएपछिको दुई कारोबार दिन नै नेप्सेमा गिरावट हुँदा सेयर लगानीकर्ताले बजेटलाई स्वागत गर्न नसेको देखिएको छ ।
सोमबार ५० अंकले गिरावट भएको नेप्सेमा आज पनि १.६३ प्रतिशतले गिरावट भएको छ । मंगलबार बजार परिसूचक नेप्से ३५.५३ अंकले गिरावट भएर २१३७.९२ अंकमा बन्द भएको छ । नेप्से सँगै सामूहिक लगानी कोषबाहेक सबै उपसूचकमा गिरावट भएको छ ।
नेप्से लगातार घट्दा बजारमा १ अर्ब ३१ करोड ७७ लाखको कारोबार भएको छ । आज कारोबार भएकामध्ये एनआइसी एसिया बैंकको सवार्धिक ५ करोड ३८ लाखको कारोबार हुँदा नबिल बैंकको ३ करोड ८९ लाखको कारोबार भएको छ । यस्तै हिमालयन डिस्ट्रिलरीको ३ करोड ६८ लाखको कारोबार भएको छ ।
आज दिनभर बजारमा १९५ कम्पनीको सेयर कारोबार भएकोमा १७५ कम्पनीको सेयरमूल्यमा गिरावट भएको छ । यस्तै, १५ वटा कम्पनीको सेयरमूल्य वृद्धि हुँदा ५ वटा कम्पनीको सेयरमूल्य भने स्थिर रहेको छ ।
आज कारोबार भएकोमध्ये उपकार लघुवित्तको सेयरमूल्य सर्वाधिक ८.२३ प्रतिशतले वृद्धि भएको छ । यस्तै, सामलिङ पावरको सेयरमूल्य ४.०२ प्रतिशतले वृद्धि हुँदा लाइफ इन्स्योरेनस कर्पोरेसन नेपालको सेयरमूल्य ३.३५ प्रतिशतले बढेको छ ।
यता मर्जर असफल भएर एक वर्षपछि कारोबार खुलेको नेपाल इन्भेष्टमेन्ट बैंकका सेयरमूल्य लगातार दोस्रो कारोबार दिन पनि नकारात्मक सर्किट लेभलमा बन्द भएको छ । यस्तै एनएलजी इन्स्योरेन्सको सेयरमूल्य ६.५० प्रतिशतले गिरावट हुँदा कर्पोरेट डेभलपमेन्ट बैंकको सेयरमूल्य ५.७५ प्रतिशतले घटेको छ ।
