काठमाडौं – कीर्तिमानी आरोही कामीरिता शेर्पा पुनः २६औं पटक सगरमाथा शिखरमा पुगेका छन् । उनले यसअघि २५औं पटक गरेको आफ्नै कीर्तिमान तोड्दै शनिबार साँझ ६ः५५ बजे विश्वको सर्वोच्च शिखर सगरमाथाको शिखरमा पुग्न सफल भएका हुन् । २६औं पटक सगरमाथाको आरोहण गरेर उनले अर्को कीर्तिमान कायम गरेका हुन् ।
शेर्पा आइसफल डाक्टरको ११ सदस्यीय बाटो सफा बनाउने टोलीको नेतृत्व गर्दै शनिबार सगरमाथा शिखरमा पुगेको उनको आरोहण व्यवस्थापन गरिरहेको सेभेन समिट ट्रेक्स एन्ड एक्सीपिडिसन प्रालिले जानकारी दिएको हो ।
काठमाडौंस्थित सेभेन समिट ट्रेक्सका अध्यक्ष मिग्मा शेर्पाले कामीरितासहित ११ जना नेपाली शेर्पाहरुको समुहले शनिबार बेलुकी ६ः५५ बजे सगरमाथा चुचुरोमा पाइला राखेको बताए । मिङमा शेर्पाले जानकारी गराएअनुसार विश्व कीर्तिमानी आरोही कामीरिताको नेतृत्वमा ११ जना शेर्पा गाइड शुक्रबार साँझ डोरी टाँगेर बाटो बनाउँदै चुचुरोतर्फ लागेका थिए । कीर्तिमानी आरोही कामीरितासहितको टोली सगरमाथा आरोहणका लागि बाटो बनाउँदै र डोरी टाँग्दै शनिबार साँझ शिखरमा पुगेको हो ।
सोलुखुम्बुको थामेमा सन् १९७० मा जन्मेका कामीरिताको नाममा सन् २०१८ देखि सबैभन्दा धेरैपटक सगरमाथा आरोहण गरेको कीर्तिमान कायम छ । उनले मे १६ सन् २०१८ मा २२औं पटक सगरमाथा आरोहण गरी कीर्तिमान राख्न सफल अर्का आरोही आप्पा शेर्पाको कीर्तिमान तोडेका थिए ।
अर्का आरोही आप्पा शेर्पाको कीर्तिमान तोडेका कामीरिताले त्यतिबेला पनि आफ्नो काम नै सगरमाथा चढ्ने भएकाले स्वास्थ्यले साथ दिएमा अर्को कीर्तिमान बनाउने बताएका थिए । त्यसपछि उनले २३औं, २४औं र २५औं पटक सगरमाथाको शिखर चुमेर आफ्नै कीर्तिमान तोड्दै अघि बढिरहेका थिए । अहिले पुनः उनले २६औं पटक सगरमाथाको शिखरमा पुगेर नयाँ कीर्तिमान कामय गराएका हुन् ।
यो नयाँ रेकर्डसँगै १३ मे सन् १९९४ मा पहिलोपटक सगरमाथाको शिखर चुमेका कामीरिताको नाममा ८ हजार मिटर अग्ला चुचुरोमा सबैभन्दा बढी आरोहण गरेको कीर्तिमान समेत रहेको छ ।
सगरमाथा आरोहणको उत्कृष्ट मौसम तथा अनुकूल समय यसपटकको वसन्त ऋतुको हिमाल आरोहणका लागि बाटो बनाउँदै शनिबार साँझ कामीरितासहित ११ जना शेर्पाको समूह सगरमाथा चुचुरोमा पुगेको हुन् । यो सफलता सँगै सोलुखुम्बुको थामेका ५२ वर्षीय आरोही कामीरिताले २६औं पटक सगरमाथा चुमेर आफ्नै २५औं पटकको विश्व कीर्तिमान तोडेका हुन् ।
अब कामीरितासहित यी सबै शेर्पाको समूह आइतबार बेलुकीसम्म सगरमाथा आधार शिविरसम्म फर्किने सेभेन समिट ट्रेक्स एन्ड एक्सीपिडिसनले जनाएको छ । कामीरिताको यो नयाँ कीर्तिमानबारे पर्यटन विभागले अहिलेसम्म आधिकारिक जानकारी गराएको छैन । विभागले अब यही सेभेन समिट ट्रेक्स एन्ड एक्सिपिडिसनको प्रमाणलाई आधार बनाएर नयाँ रेकर्ड कायम भएको मान्यता दिएर डिनिजबुकमा पठाउनेछ ।
