काठमाडौं,चैत्र ८, स्मार्ट अक्षर संम्वाददाताः सेयर बजारको उकालो यात्राले मंगलबार पनि निरन्तरता पाएको छ । यस दिन नेप्से सूचक १६.०४ अंकले बढेर २६५०.७० विन्दुमा आएको छ । २ अर्ब ५१ करोड रुपैयाँभन्दा बढीको सेयर कारोबार भएको छ । इमर्जिङ नेपालको सेयर भाउमा सकारात्मक सर्किट लागेको छ । सोमबारदेखि बजारले विस्तारै सकारात्मक लय समात्न थालेको हो । बजारले २६ सयको विन्दुमा बटम लगाएपछि सुस्तरुपमा माथितिरको यात्रा तय गरिरहेको छ । बजार क्रमशः बढ्छ वा केही समय साइडवेजमा बस्छ भनेर लगानीकर्ता र विश्लेषकहरुले चासोका साथ हेरिरहेका छन् ।
करिब ८ महिनायता नेप्से सूचक करेक्सनकै क्रममा रहेको छ । यसअघिको ३२ सय उच्च विन्दुलाई नेप्सेले अहिलेसम्म क्रस गर्न सकेको छैन । सोही कारण यो चरणलाई करेक्सन पिरियड मानिएको हो । चुनावी माहोल नजिकिंदै जाँदा पनि बजार अझै अपेक्षा अनुसार बढ्न सकेको छैन । चुनावी चहलपहलले बजारमा पैसा ल्याउने र त्यसको सकारात्मक प्रभाव पर्ने आम अपेक्षा पूरा भइसकेको छैन । कतिपयले भने चुनावमा खर्च हुने ठूलो रकम बैंकिङ प्रणालीमा नआएको र बाहिरबाटै खर्च हुन सक्ने पनि आँकलन गरेका छन् ।
चर्को ब्याजदर, तरलता अभाव र केन्द्रीय बैंकको कतिपय नीतिहरुले पनि सेयर बजार केही मारमा परेको अवस्था छ । तथापि, यी समस्याहरु सुरु भएको पनि लामो समय पूरा भइसकेको छ । अब बजारले विस्तारै यी समस्याहरुसँग मुकाबिला गर्दै अघि बढ्ने कतिपयको भनाई रहेको छ ।
केहीले भने बैंकिङ प्रणालीमा पर्याप्तमात्रामा तरलता देखिएपछि बजारले गति लिने विश्लेषण गरिरहेका छन् । निरन्तर घटेको बजार विस्तारै माथि लाग्ने प्रयास गर्नुले सकारात्मक संकेत दिन्छ । तथापि, लगानीसम्बन्धी निर्णय लिंदा लगानीकर्ताले स्वअध्ययन गर्नु आवश्यक हुनेछ । लगानीकर्ताले कुन उद्देश्यले सेयर किन्ने हो ? आफू इन्भेष्टर कि ट्रेडर भन्नेसमेत ध्यान दिंदै सोही अनुसार रणनीतिहरु तय गर्नुपर्ने हुन्छ ।
सबल वित्तीय सूचक भएका कम्पनीहरुमा सकेसम्म दीर्घकालीन हिसाबले लगानी गर्न सके लाभ लिन सकिने अनुभवीहरु बताउँछन् । यसैगरी, लगानी गरिने क्षेत्र तथा समूहहरुको तुलनात्मक अध्ययन, इन्डस्ट्री ग्रोथ रेट लगायतका सूचकहरुमा पनि लगानीकर्ताले अध्ययन गर्नुपर्ने हुन्छ । ब्लुचीप कम्पनी छान्ने कि ग्रोथ ओरियन्टेड कम्पनी छनोट गर्ने भन्नेमा पनि योजना बनाउन विश्लेषकहरुले सुझाव दिने गरेका छन् ।
यसैगरी, उक्त कम्पनीको वित्तीय विवरण, नाफा, रिजर्भ, खुद ब्याज आम्दानी, वितरणयोग्य नाफा, इपीएस, पीइ रेसियो, नेटवर्थ लगायतका महत्वपूर्ण सूचकहरु पनि ख्याल गर्न सके लगानीसम्बन्धी निर्णय लिन सजिलो हुनेछ । २३५ कम्पनीको ५३ लाख २९ हजारभन्दा बढी कित्ता सेयर खरिदबिक्री भएको छ । १५ करोड ३३ लाख रुपैयाँभन्दा बढीसहित खरिदबिक्री रकममा प्रभु इन्सुरेन्सको संस्थापक सेयर अग्रस्थानमा रहेको छ । यसैगरी, दोस्रो र तेस्रो स्थानमा क्रमशः नेपाल टेलिकम र शिवम् सिमेन्ट्स रहेका छन् ।
