काठमाडौँ- प्रधानमन्त्री केपी शर्मा ओलीले नेपाल क्रिकेट संघका पदाधिकारी, खेलाडी र कलाकारसँग छलफल गरेका छन्। सिंहदरबारमा आइतबार बिहान उनीहरुसँग रंगशाला निर्माणको बारेमा छलफल गरेका हुन्।
प्रधानमन्त्री ओलीले बोलाएको छलफलमा क्यानका पदाधिकारी, खेलाडीसहित गायक/कलाकार बद्री पंगेनी,प्रकाश सपूत,रचना रिमाल,राजा राजेन्द्र पोखरेल,मिरुना मगरलगायत सहभागी थिए।
भेटपश्चात ओलीले फेसबुकमार्फत भनेका छन्,‘क्रिकेट रंगशालाका विषयमा आज क्यानका पदाधिकारी,खेलाडी,खेल प्रेमी कलाकार र सचिवालयका साथीहरुबीच छलफल भयो। यससँगै रंगशाला निर्माणको कामलाई द्रूत गतिमा अघि बढाउन सजिलो हुने छ। आजको बिहानी खाजा भेटपछि म उत्साहित छु।’
प्रधानमन्त्री केपी शर्मा ओली नेतृत्वको सरकारको पहिलो मन्त्रिपरिषद् बैठकले ३०० दिनभित्र कीर्तिपुरस्थित टियु क्रिकेट रंगशालामा फ्लड लाइट र प्याराफिट निर्माण गर्ने निर्णय गरेको छ। प्रधानमन्त्री ओलीले क्रिकेट रंगशालालाई सुविधा सम्पन्न बनाउने घोषणा गरेका थिए।
तत्पश्चात रंगशालाको कामलाई द्रूत गतिमा अघि बढाउन ओलीले विभिन्न चरणमा छलफल गरिरहेका छन्। ओलीले यस अगाडि क्यानका पदाधिकारी र त्रिभुवन विश्वविद्यालयका उपकुलपति प्राडा. केशरजंग बराल, विश्वविद्यालयका रेक्टर र रजिष्टारसँग पनि छुट्टाछुट्टै छलफल गरेका थिए। रंगशाला रहेको जग्गा लिजमा उपलब्ध गराउने विषयमा उनीहरूबीच छलफल भएको हो। प्रधानमन्त्री ओलीले टियु क्रिकेट रंगशाला रहेको जग्गा लिजमा उपलब्ध गराउन आग्रह गरेका थिए।
पछिल्लो समय नेपाली क्रिकेटले विश्वमै आफ्नो पहिचान दिलाउन सफल भएको छ। नेपाली टोली हालै विश्वकप खेलेको थियो। विश्वकपमा तीनवटै खेलमा पराजित भए पनि नेपाली टोलीले प्रतिस्पर्धात्मक खेल खेलेको थियो। महिला टोली पनि आजै एसिया कप खेलेर फर्किएको छ। उसले एसिया कपमा पहिलोपटक जित दर्ता गरेको थियो। युएईसँग जिते पनि भारत र पाकिस्तानसँग भने नेपाल पराजित भएको थियो।
