काठमाडौँ- पछिल्लो एक महिनाको अवधिमा आगलागी र वन डढेलोको घटनामा परी देशभर २७ जनाको मृत्यु भएको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार २०८१ वैशाख १ गतेदेखि ३१ गतेसम्मको अवधिमा उनीहरूको मृत्यु भएको हो ।
उक्त अवधिमा आगलागीका घटनामा परी २१ जना र वन डढेलोका घटनामा परी ६ जनाको मृत्यु भएको प्राधिकरणले जनाएको छ ।
प्राधिकरणका अनुसार वैशाख महिनामा मात्र आगलागीका घटनाले ५० करोड ६७ लाख ६८ हजार ५९० रुपैयाँ बराबरको आर्थिक क्षति गरेको छ । वन डढेलोको घटनाले ६ करोड ३० लाख ४२ हजार ४०० रुपैयाँ बराबरको आर्थिक क्षति भएको प्राधिकरणले जनाएको छ ।
वैशाख महिनामा विभिन्न प्रकारका विपद्का घटनामा परी ३९ जनाले ज्यान गुमाएको प्राधिकरणको तथ्यांकले देखाउँछ । विपद्का घटनाले उक्त समयमा कुल ५८ करोड १६ लाख ३० हजार ६९० रुपैयाँ बराबरको आर्थिक क्षति गरेको छ ।
२०८० सालको वैशाख महिनामा आगलागी र वन डढेलोका घटनामा परी १६ जनाले ज्यान गुमाएका थिए भने ३८ करोड ८६ लाख ७१ हजार ८०० रुपैयाँ बराबरको आर्थिक क्षति गरेको थियो । सोही अवधिमा विभिन्न विपद्का घटनामा परी ३८ जनाको मृत्यु भएको थियो । २०८० सालको वैशाखमा विभिन्न विपद्का घटनाले ३९ करोड ७१ लाख ५१ हजार ८०० रुपैयाँ बराबरको आर्थिक क्षति गरेको थियो ।
