काठमाडौँ- प्रतिनिधिसभाका सभामुख देवराज घिमिरेले नयाँ कार्यतालिकाअनुसार संसद्को काम सहज रूपमा अघि बढ्ने वातावरण बनाउन दलहरुसँग आग्रह गरेका छन् । शनिबार सिंहदरबारमा संसद्मा प्रतिनिधित्व गर्ने दलका मुख्य सचेतक र सचेतकहरूसँग छलफल गर्दै सदनको अवरोध हटाएर नयाँ कार्यतालिकाअनुसार सदनलाई सहज रूपमा अघि बढाउने वातावरण बनाउन आग्रह गरेका हुन् ।
छलफलपछि कांग्रेस सचेतक सुशीला थिङले चैत १८ देखि २१ गतेसम्म सदनको बैठक चल्ने र त्यसलाई प्रभावकारी बनाउने विषयमा छलफल भएको बताइन् । राजनीतिक दलसम्बन्धी विधेयक विवादमा जोडिएकाले यसलाई २७ गतेको बैठकसम्मलाई सार्ने सहमति भएको उनको भनाइ छ ।
उनले बैठकमा सदनमा कांग्रेसले राखेको मागका विषयमा पदाधिकारी बैठकमा छलफल गर्ने सदनमा कसरी अघि बढ्ने भन्ने विषयमा निष्कर्षमा पुग्ने जानकारी दिइन् ।
गृहमन्त्रीका बारेमा संसदीय छानबिन समिति बनाउनुपर्ने अडान कायमै रहेको उनको भनाइ छ ।
माओवादी केन्द्रका प्रमुख सचेतक हितराज पाण्डेले समितिको बैठक पनि मिति नै तोकेर कार्यतालिका बनाइने, समितिबाट पारित भएका विधेयकलाई प्राथमिकतामा राखेर अघि बढ्नुपर्नेलगायत विषयमा छलफल भएको बताए ।
एमाले मुख्य सचेतक महेश बर्तौलाले सदनलाई सहज रूपमा सञ्चालन गर्न प्रतिपक्षीले पनि उचित वातावरण बनाउनुपर्ने र सरकारले पनि सदनलाई विजनेश दिनुपर्ने बताए । बर्तौलाले कांग्रेसले उठाएको विषयमा प्रधानमन्त्री जवाफ दिइसकेकाले राजनीतिक पूर्वाग्रह राख्न नहुने धारणा राखे ।
रास्वपा प्रमुख सचेतक सन्तोष परियारले गृहमन्त्रीको विषयमा उठेका विषयको जवाफ सम्बन्धित व्यक्तिले दिन पाउनुपर्ने र रास्वपा त्यसका लागि सदैव तयार रहेको बताए ।
