काठमाडौँ – नेकपा एमालेका अध्यक्ष केपी शर्मा ओलीले नयाँ सत्ता गठबन्धनबाट पूरै कार्यकाल माओवादी अध्यक्ष पुष्पकमल दाहाल ‘प्रचण्ड’ नै प्रधानमन्त्री हुन सक्ने संकेत गरेका छन्। प्रेस चौतारी कैलालीले मंगलबार धनगढीमा आयोजना गरेको पत्रकार सम्मेलनमा उनले आफूलाई प्रधानमन्त्रीको इच्छा नभएको भन्दै यस्तो संकेत गरेका हुन्।
पूर्वप्रधानमन्त्री ओलीले एमालेबाट अरू प्रधानमन्त्री बन्न अगाडि नसरेको पनि बताए। ‘अहिले मलाई त्यति मन पनि लागेको छैन। अरू केही (एमालेबाट) अगाडि पनि सरेका छैनन्। के गर्ने त उहाँ नै खानुहोला जस्तो पो देखिन्छ त’‚ ओलीको भनाइ छ।
२१ फागुनमा पाँचदलीय नयाँ सत्ता गठबन्धन बने पनि प्रधानमन्त्रीका सन्दर्भमा भएको सहमति गाेप्य राखिएकाे छ। एमाले, माओवादीकै दोस्रो तहका नेताहरू पनि यसबारे अनभिज्ञ छन्।
दुई अध्यक्षबीच बाँकी करिब चार वर्ष आधा–आधा सरकारको नेतृत्व गर्ने सहमति भएको हुन सक्ने उनीहरूले अनुमान मात्रै गर्दै आएका छन्। यसबारे भएको सहमति प्रचण्ड–ओलीमा मात्र सीमित रहेको बताइएको छ।
