काठमाडौं – राष्ट्रियसभा निर्वाचनमा वाग्मती प्रदेशमा सत्तारूढ गठबन्धनका चार उमेदवार निर्वाचित भएका छन् ।
महिलातर्फ कांग्रेसकी विष्णुदेवी पुडासैनी, अन्यमा जीतजंग बस्नेत, अपांगतर्फ माओवादी केन्द्रका श्रीकृष्णप्रसाद अधिकारी र नेकपा (एकीकृत समाजवादी)बाट दलिततर्फ घनश्याम रिजाल विजयी भएका हुन् ।
पुडासैनीले ६ हजार ६२२, अन्यमा बस्नेतले ६ हजार ५३१ , अपांगतर्फ अधिकारीले ६ हजार ३८३ र दलिततर्फ रिजालले ६ हजार ५१२ मतभार प्राप्त गरेका थिए ।
महिलातर्फ एमालेकी रोचकुमारी चौलागाईंले दुईहजार ५५२ मतभार, दलिततर्फ ध्रुवराज बिकले तीनहजार ५२ , अपांगतर्फ त्रिलोचन निर्मल पौडेलले दुई हजार ७३४ मत, अन्यतर्फ विवेक देवकोटाले दुई हजार ३५९मतभार प्राप्त गरे ।
कोशी प्रदेशबाट राष्ट्रियसभा सदस्यका लागि भएको चुनावमा सत्ता गठबन्धनका कृष्णप्रसाद सिटौला विजयी भएका छन्।
उनले एमाले-राप्रपा गठबन्धनका उम्मेदवार उद्धव पौडेललाई पराजित गरेका हुन्। २ जना प्रदेशसभा सदस्यले फ्लोर क्रस गरेर पौडेललाई मत हाले पनि स्थानीय तहका जनप्रतिनिधिको मत भने पौडेलको पक्षमा परेन। पौडेलले स्थानीय तहबाट १०९ जनाका मतमात्र पाए।
सिटौलाले प्रदेशसभा सदस्यमध्ये ४५ जनाको मतमात्र पाए भने प्रतिस्पर्धी राप्रपाका पौडेलले ४७ जनाले मत पाए।
स्थानीय तहतर्फ सिटौलाले १५३ मत प्राप्त गरे भने राप्रपाका पौडेलले १०९ मत प्राप्त गरे।
कोशी प्रदेशसभामा सत्ता गठबन्धनका ४७ जना प्रदेशसभा सदस्य छन्। राप्रपा र एमालेका ४५ जना मात्र प्रदेशसभा सदस्य छन्। एकजनाको मत भने बदर भएको छ। स्थानीय तहतर्फ ४ मत बदर भएको छ।
सत्ता गठबन्धनले राष्ट्रियसभाको अध्यक्ष बनाउने गरी सिटौलालाई कोशीबाट उम्मेदवार बनाएको व्यापक चर्चा छ।
यसअघि प्रदेशसभातर्फ महिलामा एमालेकी रुक्मिणी कोइराला विजयी भएकी छन्।
गण्डकी प्रदेशमा राष्ट्रियसभा सदस्यमा सत्ता गठबन्धनका उमेदवार विजयी भएका छन्।महिलातर्फ माओवादीकी मनरुपा शर्मा विजयी भएका छन् । अपांगता/अल्पसंख्यकतर्फ कांग्रेसका पदम परियार र खुलातर्फ कांग्रेसका किरणबाबु श्रेष्ठ विजयी भएका छन्। शर्माले तीन हजार ६६० मत पाइन भने परियारले तीन हजार ७७९ मतभार ल्याए। श्रेष्ठले तीन हजार ८०८ मतभार प्राप्त गरे।
