काठमाडौँ – त्रिभुवन अन्तर्राष्ट्रिय विमानस्थलमा जहाजहरूको भूमिस्थ प्रबन्ध सेवा (ग्राउन्ड ह्यान्डलिङ) मा नेपाल वायुसेवा निगमको एकाधिकार तोडिने भएको छ । नेपाल नागरिक उड्डयन प्राधिकरले अबदेखि ग्राउन्डह्यान्डलिङ प्रतिस्पर्धाका माध्यमबाट गर्ने भएपछि निगमको एकाधिकार तोडिने भएको हो ।
प्राधिकरणले यसबारे शुक्रबार निर्णय गर्दै आफ्नो एक्स पेजमार्फत निगमले त्रिभुवन अन्तर्राष्ट्रिय विमानस्थलमा गर्दै आएको भूमिस्थ प्रबन्ध सेवालाई अब कानुनअनुसार प्रतिस्पर्धामार्फत गराउने निर्णय गरेको उल्लेख गरेको छ ।
प्राधिकरणले यो निर्णय युरोपियन युनियन (ईयू) ले नेपाली वायु सेवालाई आफ्ना सदस्य मुलुकमा लगाएको प्रतिबन्धको निरन्तरता दिने निर्णय गरेको दोस्रो दिन गरेको हो ।
वायुसेवा सञ्चालनमा निगमका अत्याधिक कमीकमोजरीसहित ईयूले नेपाललाई प्रतिवेदन बुझाएसँगै प्राधिकरणले अबदेखि भूमिस्थ प्रबन्ध सेवालाई प्रतिस्पर्धामार्फत गराउने निर्णय गरेको हो । ‘नेपाल नागरिक उड्डयन प्राधिकरण विमानस्थल सेवा शुल्क नियमावली, २०७५ को नियम ५ (२) बमोजिम त्रिभुवन अन्तर्राष्ट्रिय विमानस्थलमा भूमिस्थ प्रबन्ध सेवा प्रतिस्पर्धाको माध्यमबाट छनोट भएको संस्थामार्फत गराउने निर्णय भएको छ,’ प्राधिकरणले आफ्नो आधिकारिक एक्स पेजमा लेखेको छ ।
निगमले काठमाडौंमा आउने विदेशी विमान तथा कार्गो चार्टर उडानको भूमिस्थ सेवा सञ्चालन गर्दै वार्षिक कम्तीमा ३ अर्ब रुपैयाँ हाराहारी आम्दानी गर्दै आएको छ । प्राधिकरणले अब प्रतिस्प्रर्धा गराउँदा निगमले भूमिस्थ सेवा गुमाएमा उसलाई निगम सञ्चालन गर्न कठिन हुने छ । हाल निगमका १२ सयभन्दा बढी कर्मचारीको सेवा सुविधा यही भूमिस्थ प्रबन्ध सेवाको आम्दानीमा निर्भर रहेको उसले जारी गरेका वित्तीय प्रतिवेदनहरूमा देखिन्छ ।
निगमले हाल आफ्नोसहित ३० वटा अन्तर्राष्ट्रिय वायुसेवाका जहाजलाई त्रिभुवन अन्तर्राष्ट्रिय विमानस्थलमा भूमिस्थ प्रबन्ध सेवाअन्तर्गत ती जहाजको सरसफाइ, उडानका लागि ट्याक्सी वेसम्म पुसब्याक, जहाजमा कार्गो लोड गर्ने झिकेर टर्मिनल भवनमा ल्याइदिनेलगायतको सेवा दिँदै आएको छ । यो सेवा गरेबापत उसले विदेशी वायुसेवाहरूबाट अमेरिकी डलरमा जहाजको प्रकार, तौलअनुसार दस्तुर उठाउछ । प्राधिकरणको क्षेत्रभित्र निगमले यो सेवा गरेवाफत विमानस्थललाई भाडा दिने गरेको छ ।
यसैबीच प्राधिकरणले नेपाल वायुसेवा निगममा हालै युरोपिनय युनियनले गरेको अडिट (सम्परीक्षण) मा अत्याधिक सुधार गर्नुपर्ने, उडान सुरक्षा प्रणाली कमजोर देखिएको, बारम्बार अडिटका क्रममा देखिएका त्रुटि सुधार नगरेको लगायतका दर्जनौं विषय त्यहाँको नेतृत्वका कारण कमजोर भएको उल्लेख गर्दै निगमका कार्यकारी अध्यक्ष युवराज अधिकारीलाई प्रदान गरिएको ‘एकाउन्टेबल म्यानेजर’ को अधिकार खोस्ने सात दिने स्पष्टीकरण सोधेको छ । प्राधिकरणले अधिकारीलाई शुक्रबार स्पष्टीकरण सोध्दै सात दिनभित्र जवाफ मागेको छ ।
यसैबीच निगममा रहेको कांग्रेसनिकट कर्मचारी संगठनले कार्यकारी अध्यक्ष अधिकारी निगममा राजनीति फेरो समातेर आएपछि निगमको आर्थिक अवस्था खस्केको, भ्रष्टाचार बढेको, नेतृत्व प्रभावकारी नभएको जनाउँदै कार्यकारी प्रमुखबाट बर्हिगमन हुन ९ बुँदे ज्ञापनपत्र बुझाएको छ ।
