काठमाडौँ – नेपाली कांग्रेसकाे महासमिति बैठक मंसिरमा हुने भएकाे छ । पार्टीको १४ औं महाधिवेशन सम्पन्न भएको दुई वर्षपछि कांग्रेसले मंसिर १३–१८ मा महासमिति बैठक बोलाएको हो ।
२०७८ मंसिरमा सम्पन्न महाधिवेशनले पदाधिकारी र सदस्यको निर्वाचन मात्रै गरेको थियो । ६ महिनाभित्र छुट्टै नीति महाधिवेशन गर्ने निर्णय लिएको थियो । विधानले नीति महाधिवेशनको व्यवस्था नगरेको र सहभागी प्रतिनिधिको विषयमा जटिलता देखिएपछि नीति महाधिवेशनको समेत काम गर्ने गरी महासमिति बैठक बोलाइएको हो । विधानले महाधिवेशन भएको वर्षमा बाहेक प्रत्येक वर्ष महासमिति बैठक बोलाउनुपर्ने व्यवस्था गरेको छ ।
महासमिति बैठक तयारीका लागि पार्टी सभापति शेरबहादुर देउवाको नेतृत्वमा मूल समारोह समिति गठन भइसकेको छ । जसमा पदाधिकारी, केन्द्रीय सदस्य, आमन्त्रित सदस्य, प्रदेश कार्यसमितिका सभापति एवं उपत्यकाका तीनै जिल्लाका सभापति, भ्रातृसंस्थाका केन्द्रीय अध्यक्ष सदस्य रहेका छन् ।
पार्टीको सांगठनिक प्रतिवेदन महामन्त्री थापाले र समसामयिक राजनीतिक विषयको प्रतिवेदन अर्का महामन्त्री विश्वप्रकाश शर्माले प्रस्तुत गर्नेछन् । महासमितिमा करिब २५ सय प्रतिनिधि सहभागी हुनेछन् । कांग्रेस महासमिति बैठकमा ११ जना सदस्य प्रतिनिधिसभाबाट निर्वाचित क्षेत्रबाट निर्वाचित भएर आउनेछन् । पार्टीको १४ औं महाधिवेशनकै बेलामा केही महासमिति सदस्य चयन भइसकेका छन् । त्यतिबेला निर्वाचन हुन नसकेका केही जिल्लामा महासमिति छनोट गर्ने प्रक्रिया अघि बढेको छ । प्रतिनिधिसभा निर्वाचन क्षेत्रमा दुई महिलासहित प्रत्यक्ष ७ जना, महिला, दलित, आदिवासी जनजाति, खस आर्य, मधेशी, थारू, मुस्लिम र पिछडिएका क्षेत्रबाट जनसंख्याको बनोटको आधारमा चार जना समानुपातिक समावेशी सिद्धान्तअनुसार निर्वाचित हुनेछन् । निर्वाचन क्षेत्रबाट मात्रै १८ सय १५ महासमिति सदस्यको प्रतिनिधित्व हुनेछ ।
त्यसबाहेक केन्द्रीय कार्यसमितिका वर्तमान र निवर्तमान पदाधिकारी र सदस्य, एक कार्यकालका लागि निवर्तमान महासमिति सदस्य, भ्रातृसंस्था र जनसम्पर्क समितिबाट समेत महासमिति सदस्यको प्रतिनिधित्व हुनेछ । कांग्रेसका ३५ देशमा जनसम्पर्क समिति छन् । क्रियाशील सदस्यताका आधारमा एक जनादेखि बढीमा ६ जनासम्म महासमिति सदस्य चयन हुने छन् । भ्रातृ र शुभेच्छुक संस्थाको अधिवेशनबाट ३/३ जना महासमिति सदस्य चयन हुनेछन् । १३ भ्रातृसंस्था र १८ शुभेच्छुक संस्था छन् ।
