काठमाडौँ – प्रधानमन्त्री पुष्पकमल दाहालले बजेटमा असन्तुष्ट रहेका सत्तारूढ दलहरू एकीकृत समाजवादी र जनता समाजवादी पार्टीलाई मनाउन पहल थालेका छन् । सत्ता गठबन्धनको मंगलबार बिहान बसेको बैठकमा प्रधानमन्त्री दाहालले दुवै दलको चासो रहेका क्षेत्रलाई सम्बोधन गर्ने गरी गृहकार्य अघि बढाउने आश्वासन दिएका छन् ।
एकीकृत समाजवादी र जसपाले प्रधानमन्त्री दाहाललाई भेटेर बजेट संशोधन नभए पारित हुन नदिने चेतावनी दिएका थिए । प्रधानमन्त्री दाहाल, अर्थमन्त्री प्रकाशशरण महत र कांग्रेस सभापति शेरबहादुर देउवाका गृहजिल्लामा ठूलो हिस्सामा बजेट विनियोजन गरेको भन्दै उनीहरू आक्रोशित छन् । बजेटकै कारण गठबन्धनमा खटपट परेपछि प्रधानमन्त्री दाहालले मंगलबार बिहान बालुवाटारमा बैठक बोलाएका थिए ।
अर्थमन्त्री महत निकट स्रोतका अनुसार बजेटमा संशोधन गर्न नसकिने स्थिति रहेकाले असन्तुष्ट पक्षलाई मनाउन योजना समेट्ने तयारी छ । कानुनमन्त्री धनराज गुरुङले बजेट विनियोजनमा केही गुनासा आएको उल्लेख गर्दै यसमा मिलाउन अर्को मन्त्रिपरिषद् बैठकमा छलफल हुने बताए ।
प्रधानमन्त्रीका प्रेस सल्लाहकार गोविन्द आचार्यका अनुसार गठबन्धनको बैठकमा कोशी प्रदेश सरकारमा देखिएको संकटबारे पनि छलफल भएको छ । एमाले नेतृत्वको कोशी प्रदेश सरकारको प्रदेशसभामा बहुमत नभएकाले संकट छ । सत्ता गठबन्धनको पनि बहुमत नपुग्ने अवस्था रहेकाले सरकारको नीति तथा कार्यक्रम र बजेट ल्याउन अप्ठ्यारो परेको छ ।
