Nepali
English
काठमाडौँ – सर्वोच्च शिखर सगरमाथाको साउथकोलबाट बिहीबार चिनियाँ आरोही ली स्याङ्तावोले प्याराग्लाइडिङ उडान गरेका छन् ।
यस सिजनका लागि पटके प्याराग्लाइडिङ उडान अनुमति पाएको कास्कीको बाबु एड्भेन्चर्स प्याराग्लाइडिङ प्रालिािथ का संचालक सानोबाबु सुनुवारका अनुसार चिनियाँ आरोही स्याङ्तावो मंगलबार सगरमाथा आरोहणका लागि आधार शिविरबाट उक्लेका थिए ।
उनले बिहान सवा ९ बजे सगरमाथा आरोहणबाट फर्केपछि ७ हजार ९ सय ६ मिटर उचाइ (साउथकोल) बाट सगरमाथा आधार शिविरमा सोलो (एकल) प्याराग्लाइडिङ गरेका थिए । ‘चिनियाँ आरोही लीले खराब मौसम भएका कारण सगरमाथाको चुचुरोसम्मै पुग्न पाएनन्,’ आधारशिविरमा प्याराग्लाइडिङ उडानको संयोजन गरिरहेका सुनुवारले भने, ‘चुचुरोमै पुग्न नसकेपछि उनी फर्किँदा चौथो शिविरमाथिबाट प्याराग्लाइडिङ उडानबाट फर्के । आधार शिविरमा पुग्न उनले ४५ मिनेट लगाए ।’
संस्कृति, पर्यटन तथा नागरिक उड्डयनमन्त्री सुदन किरातीले नेपालका हिमालमा हुने आरोहणपछि प्याराग्लाइडिङ खुला गर्न वैशाख २९ गते बाबु एड्भेन्चर्स प्याराग्लाइडिङ प्रालिलाई एक पटकका लागि परिक्षण उडान अनुमति दिने निर्णय गरेका थिए । हिमालमा आरोहणबाहेक अन्य सहासिक गतिविधिमार्फत विदेशी पर्यटक आर्कषित गर्न मन्त्रालयले हिमालका चुचुराबाट प्याराग्लाइडिङ खुला गर्न नीति बनाउने तयारी गरिरहेको छ ।
मन्त्रालयले अष्ट्रेलियन नागरिक हट केननेथ नेल, मरकस चार्लिस लोयनी र चिनियाँ नागरिक ली स्याङ्तावोलाई मन्त्रिस्तरीय निर्णयबाट प्याराग्लाइडिङ अनुमति दिएको थियो । उनीहरुबाहेक मन्त्रालयले बाबु एड्भेन्चर्स प्याराग्लाइडिङ प्रालिका संचालक तथा प्याराग्लाइडिङ उडानका प्रशिक्षक पाइलटसमेत रहेका सानोबाबु सुनुवार र निर्मल पुर्जा मगरलाई लोबुचे, मेरापिक र सगरमाथा हिमालबाट उड्न पाउने गरी प्याराग्लाइडिङ उडानको अनुमति दिइएको थियो । सुनुवारका अनुसार दुई अष्ट्रेलीयन नागरिकहरु हट केननेथ नेल र मरकस चार्लिस लोयनीले तीन दिनअघि मेरा पिकबाट फेरिचेसम्म प्याराग्लाइडिङ उडान गरिसकेका छन् ।
मौसम बिग्रिँदै गएको र अन्य व्यस्तताले अब यो सिजनमा निर्मल पुर्जा र सुनुवारले प्याराग्लाइडिङ उडान नगर्ने बताएका छन् । ‘पर्यटन मन्त्रालयले ५ जनालाई उडान अनुमति दिएको थियो ।
