काठमाडौँ – नेपाली कांग्रेसले भ्रातृ संस्थाहरू नेपाल विद्यार्थी संघ र तरुण दललाई पूर्णता दिँदा विधानबमोजिम उमेर हदबन्दी कायम गर्ने भएको छ ।
पार्टीको शुक्रबार बसेको पदाधिकारी बैठकले नेविसंघको ३२ र तरुण दलको ४५ वर्षको उमेर हदबन्दीअनुसार संगठन विस्तार गर्ने निर्णय गरेको हो ।
सहमहामन्त्री जीवन परियारले बैठकले २०७८ चैत ९ गतेभित्र ३२ वर्ष नपुगेकालाई नेविसंघ र ४५ वर्ष नपुगेकालाई तरुण दलमा जिम्मेवारी दिने निर्णय गरेको जानकारी दिए । उक्त मितिमा नेविसंघको अध्यक्षमा दुजाङ शेर्पा र तरुण दलको अध्यक्षमा विद्वान गुरुङलाइ जिम्मेवारी दिइएको थियो ।
सोही मितिलाई आधार मानेर उमेर हद तोकिएको हो । यसको अर्थ ०७८ चैत ९ गते ३२ वर्ष पुग्न लागेका वा पुगेका र अहिले ३२ काटिसकेकाहरूले पनि समितिमा अवसर पाउनेछन् । समिति भने पदाधिकारी नराखी अर्थात् प्लेन कमिटी ल्याउने बैठकले निर्णय गरेको छ ।
“आइतबारसम्म समिति ल्याउने गरी तयारी भएको छ । हामीले आज दुवै भ्रातृ संस्थाको प्रमुखलाई बोलाएर आएका नामहरूको सर्टलिस्टिङ गर्न भनेका छौँ,” परियारले भने ।
बैठकले पार्टीको कुनै पनि संरचनामा नबसेका र जनप्रतिनिधि बनेकाहरूलाई भ्रातृ संस्थामा समावेश नगर्ने निर्णय पनि गरेको छ ।
त्यस्तै, पदाधिकारी बैठकले विधान, २०१७ (संशोधनसहित) को धारा २१ को उपधारा (१०) बमोजिम केन्द्रीय सदस्यमा नेता डा. मीनेन्द्र रिजाललाई मनोनीत गरेका छन्।
रिजाल पार्टीको १४औँ महाधिवेशनमा महामन्त्रीमा पराजित भएका थिए ।
