काठमाडौं- राष्ट्रिय स्वतन्त्र पार्टीले प्रधानमन्त्री पुष्पकमल दाहाल प्रचण्ड नेतृत्वको सरकारमा सहभागी हुने नहुने विषयमा शुक्रवार निर्णय लिने भएको छ । आगामी शुक्रबार पुन: बैठक बसेर सरकारबारे स्पष्ट निर्णय गर्ने महामन्त्री तथा प्रवक्ता मुकुल ढकालले जानकारी दिए । उनका अनुसार शुक्रबार बस्ने केन्द्रीय समिति र संसदीय दलको संयुक्त बैठकले सरकारबारे स्पष्ट निर्णय गर्नेछ ।
केन्द्रीय समिति बैठकले संसदीय दलको नेतामा पार्टी सभापति रवि लामिछानेलाई चुन्न संसदीय दललाई निर्देशन दिएको पनि उनले जानकारी दिए । संसदीय दलको बैठक दिउँसो ३ बजे बस्दै छ ।
यसैबीच राष्ट्रिय स्वतन्त्र पार्टीले विभिन्न विभागहरू गठन गरेको छ । सोमबार बसेको पार्टी केन्द्रीय समितिको बैठकले विभिन्न विभाग गठन गरेको पार्टी प्रवक्ता मुकुल ढकालले जानकारी दिए ।
बैठकले नीति तथा विचार विभाग र प्रशिक्षण विभाग प्रमुखमा महामन्त्री डाक्टर मुकुल ढकाललाई प्रमुख बनाएको छ ।
यस्तै सहमहामन्त्री कविन्द्र बुर्लाकोटीको संयोजकत्वमा संगठन विभाग, अभियान तथा प्रचार प्रसार विभागमा विपिन आचार्य, अन्तर्राष्ट्रिय सम्बन्ध विभागमा शिशिर खनाल, प्रवास नेपाली सम्पर्क विभागमा डीपी अर्याल, मानविय प्रवद्धन विभाग कुसुम महर्जन, जनसम्पर्क विभाग प्रमुख दिपक बोहोरा लगायत रहेका छन् ।
