काठमाडौँ – राष्ट्रिय स्वतन्त्र पार्टीले समानुपातिक सांसद ढाकाकुमार श्रेष्ठको ठाउँमा विन्दबासिनी कंसाकारलाई सांसद बनाउने भएको छ।
श्रेष्ठ र मेडिकल व्यवसायी दुर्गा प्रसाईँबीच भएको रकम लेनदेनको अडियो सार्वजनिक भएपछि उनको समानुपाति सांसद्सहित पार्टीको साधारण सदस्य पदसमेत गुमेको हो।
विज्ञप्ति
राष्ट्रिय स्वतन्त्र पार्टीको आज बसेको केन्द्रीय समितिको बैठकलाई पार्टीबाट समानुपातिक कोटामा प्रतिनिधि सभा सदस्य बन्नुभएका माननीय डा. ढाका कुमार श्रेष्ठको पार्टीको साधारण सदस्यता खारेज गरेको छ ।
हालै सञ्चारमाध्यमहरुमा सार्वजनिक भएको टेलिफोन संवादको अडियो रेकर्ड प्रकरणले पार्टीको छविमाथि उठेका प्रश्न, उक्त प्रकरणका सम्बन्धमा पार्टीको केन्द्रीय अनुशासन तथा आचरण समितिले गरेको छानबिन पश्चात् केन्द्रीय समितिलाई बुझाएको सिफारिससहितको प्रतिवेदन तथा पार्टी विधानको धारा ५६ (४) बमोजिम डा. श्रेष्ठको पार्टीको साधारण सदस्यता खारेजी गर्ने निर्णय गरिएको छ । यस निर्णयले उहाँको सांसद पद खारेज गरी उक्त रिक्त सांसद पदमा कानुन बमोजिम निर्वाचन आयोगमा पेश गरिएको समानुपातिक बन्दसूची क्रमानुसार श्री बिन्दबासीनी कंसाकारलाई निर्वाचित गरी प्रतिनिधि सभा सदस्य पदमा स्थापित गर्ने प्रक्रिया अगाडि बढाउने समेत निर्णय गरेको छ ।
त्यसैगरी अडियो रेकर्ड प्रकरणका सम्बन्धमा अख्तियार दुरुपयोग अनुसन्धान आयोग लगायतका अधिकार सम्पन्न सरोकारवाला निकायले छानबिन थालेका सञ्चारमाध्यमहरुमा प्रकाशित भएको परिप्रेक्ष्यमा त्यस्तो छानबिनमा आवश्यक सहयोग गर्न पार्टी सदैव तयार रहने छ ।
