काठमाडौँ – राष्ट्रिय स्वतन्त्र पार्टी (रास्वपा)का सभापति रवि लामिछानेले सांसद ढाकाराम श्रेष्ठ जोडिएको अडियोबारे भोलि निर्णय हुने बताएका छन् ।
मंगलबार चितवनको चुनावी सभालाई सम्बोधन गर्दै रविले पार्टीको छानबिन समितिले गरेको सिफारिसअनुसार भोलि निर्णय हुने बताए ।
“त्यो अडियो अथेन्टिक (आधिकारिक) हो र हाम्रो समितिले त्यसलाई कारबाही गर्न योग्य मान्यो भने कुनै पनि हालतमा कारबाही हुन्छ । यो फैसला भोलि नै हुनेछ,” उनले भने ।
“कुनै हरामखोरले रवि मेरो साथी हो भनेर पैसा खायो भने छाला त्यसको काढ्ने हो, अरूको होइन, मेरो होइन । आरोप मैले खेप्ने होइन । त्यसैले कसलाई छोडिने छैन र निर्ममभन्दा निर्मम सजाय गरिनेछ । किनकि राष्ट्रिय स्वतन्त्र पार्टी अरू पार्टीजस्तो होइन,” रविले भने ।
यता, प्रारम्भिक बयानमा सांसद श्रेष्ठले अडियो आफ्नो नभएको बयान दिएका छन् । उनले दुर्गा प्रसाईलाई नचिनेको र उनीसँग फोन संवादसमेत नगरेको जिकिर गरेका छन् ।
सार्वजनिक अडियोमा पैसा रविको कोर टिमलाई बुझाउनुपर्ने र मन्त्री सुनिश्चित हुने भनिएको छ ।
रास्वपाको अनुशासन समितिले सांसद श्रेष्ठले घुस डिल गरेको अडियोसम्बन्धी प्रतिवेदन तयार पारेको छ ।
अनुशासन समितिका संयोजक भरत देवकोटाका अनुसार प्रतिवेदन सभापति रवि लामिछानेलाई बुझाउने तयारी छ ।
