काठमाडौँ – प्रधानमन्त्री पुष्पकमल दाहाल ‘प्रचण्ड’ले संक्रमणकालीन न्यायसम्बन्धी मुद्दाको टुंगो लगाउन मध्यमार्गी विकल्प अपनाउने बताएका छन् । शनिबार सिंहदरबारस्थित सभामुखको कार्यकक्षमा बसेको प्रमुख तीन दलका शीर्ष नेताहरूको बैठकपछि सञ्चारकर्मीसँग उनले यस्तो बताएका हुन् ।
उनले बैठकमा संक्रमणकालीन न्यायसँग सम्बन्धित विधेयक, संवैधानिक परिषद्सँग सम्बन्धित विधेयक र सम्पत्ति शुद्धीकरणसम्बन्धी विधयेकलाई छिटो टुंग्याउने भन्ने बारेमा छलफल भएको बताए । यही चैत २८ गते विज्ञहरूसँग बसेर यसको प्राविधिक पाटो पनि टुंग्याइने उनले जानकारी दिए ।
“सदनभित्रको टीआरसीसँग सम्बन्धित विधेयक, संवैधानिक परिषद्सँग सम्बन्धित विधेयक र सम्पत्ति शुद्धीकरणसम्बन्धी विधयेकलाई छिटो टुंग्याउन छलफल भयो । सैद्धान्तिक रूपमा हामी सहमत नै छौँ । प्राविधिक पाटो भएकाले विज्ञहरू पनि बसेर २८ गतेको बैठकले टुंग्याउने कुरा भएको छ,” प्रधानमन्त्री प्रचण्डले भने, “हामी सरकारमा बसेकाहरूले फास्ट ट्रयाकबाट टुंग्याउने भनेका छौँ । प्रतिपक्षले समितिमा लैजाने कुरा छ, बीचको बाटो खोज्ने भन्ने पनि छ ।”
प्रधानमन्त्री दाहालले सरकार पक्षधर राजनीतिक दलहरूले भने संक्रमणकालीन न्यायसम्बन्धी विधेयक फास्ट ट्रयाकबाट नै टुंग्याउने पक्षमा रहेको खुलासा गरे।ओलीले छलफलमा संसद्लाई गतिशील बनाउने कुरामा छलफल भएको बताए। उनले अहिलेको बैठक प्रारम्भिक रहेको र बैठक सकारात्मक रहेको बताए।
ओलीले भने, ‘सदनलाई कसरी प्रभावकारी र गतिशील ढंगले बढाउने र अहिले आएका समस्यालाई कसरी समाधान गर्ने भन्ने सन्दर्भमा छलफल भयो। समितिमा कुनै न कुनै हिसाबले जानैपर्छ। दुई तीन दिनभित्र अर्को बैठक बस्छ।’
अध्यक्ष ओलीले संक्रमणकालीन न्यायसम्बन्धी विधेयक कुनै न कुनै हिसाबले समितिमा लैजानैपर्ने बताए।
