काठमाडौँ – निर्वाचन आयोगले आज उपनिर्वाचनका उम्मेदवारको अन्तिम नामावली प्रकाशन गर्दैछ।
तनहुँ १, चितवन २ र बारा २ मा सोमबार मनोनयन दर्ता गराएका उम्मेदवारविरुद्ध मंगलबारउजुरी दर्ताको समय तोकिएको थियो। तीनवटै निर्वाचन क्षेत्रमा दल र स्वतन्त्र गरी ६९ जनाले उम्मेदवारी दर्ता गरेका छन्। आयोगले आज उजुरीमाथि छानबिन गरी उम्मेदवारको अन्तिम नामावली प्रकाशन गर्नेछ।
प्रतिनिधिसभाको उम्मेदवार बन्न अयोग्य रहेको दाबी गर्दै चितवन क्षेत्र नम्बर २ का उम्मेदवार रवि लामिछानेविरुद्ध निर्वाचन कार्यालयमा चारवटा उजुरी परेका छन्।
निर्वाचन आयोगका प्रवक्ता शालिकराम पौडेलका अनुसार अनुसार एउटा उजुरी इमेलबाट आएको छ भने एउटा राष्ट्रिय जनमोर्चाबाट र अन्य दुईवटा स्वतन्त्र उम्मेदवारले रविविरुद्ध उजुरी दिएका हुन्।
संविधानको धारा २९१ ले विदेशको स्थायी आवासीय अनुमतिपत्र लिएको नेपाली नागरिकले नेपालको कुनै पनि पदमा निर्वाचित मनोनित हुनका लागि त्यस्तो आवासीय अनुमतिपत्र त्यागेको तीन महिना पुगेको हुनुपर्ने व्यवस्था गरेको छ।
संविधानको यही व्यवस्थाअनुसार रवि लामिछानेले उम्मेदवार बन्न नपाउने जिकिर गर्दै उनीविरुद्ध चारवटा उजुरी परेका हुन्।वैशाख १० मा हुने उपनिर्वाचनका लागि चितवन २ मा दलबाट १२ र स्वतन्त्र १२ गरी २४ जनाको उम्मेदवारी दर्ता भएको छ । अन्य उम्मेदवारविरुद्ध भने कुनै उजुरी परेको छैन।
वैशाख १० गते हुने उपनिर्वाचनका लागि यसअघि निर्वाचित भएर सांसद पद नै खारेज भएका रवि लामिछानेदेखि अघिल्लो चुनावमा पराजित भएका उपेन्द्र यादव, सर्वेन्द्र खनाल, शिवचन्द्र कुशवाहलगायत नेता यसपटक पनि प्रतिस्पर्धामा उत्रिएका छन्।
बारामा सत्ता गठबन्धनबाट उम्मेदवारी दर्ता गराएका जनता समाजवादी पार्टीका अध्यक्ष उपेन्द्र यादवलाई चुनौती दिन सीके राउत नेतृत्वको जनमत पार्टीले शिवचन्द्रप्रसाद कुशवाहलाई उठाएको छ। एमालेले पुरुषोत्तम पौडेल र राष्ट्रिय स्वतन्त्र पार्टीले रमेश खरेललाई उम्मेदवार बनाएको छ। प्रतिनिधिसभामा निर्वाचित रामसहाय उपराष्ट्रपतिमा निर्वाचित भएपछि त्यो क्षेत्र खाली भएको हो।
चितवन २ मा राष्ट्रिय स्वतन्त्र पार्टीका सभापति रवि लामिछाने, कांग्रेसका जितनारायण श्रेष्ठ र एमालेका रामप्रसाद न्यौपानेलगायत प्रतिस्पर्धामा छन्। सर्वोच्च अदालतले मंसिर ४ को चुनावमा निर्वाचित लामिछानेको पुरानो नागरिकता खारेज गरिदिएपछि उनको सांसद पनि खारेज हुँदा यहाँ पुनः चुनाव हुन लागेको हो।
तनहुँ १ का प्रतिनिधिसभा सदस्य रामचन्द्र पौडेल राष्ट्रपतिमा निर्वाचित भएकाले उपनिर्वाचन हुन लागेको हो । तनहुँमा नेपाली कांग्रेसका तर्फबाट गोविन्द भट्टराई, नेकपा एमालेबाट सर्वेन्द्र खनाल, स्वतन्त्र पार्टीबाट स्वर्णिम वाग्लेलगायतले उम्मेदवारी दर्ता गरेका छन्।
