काठमाडौँ – प्रधानमन्त्री पुष्पकमल दाहालले तीन महिनामै सातौं पटक मन्त्रिपरिषद् पुनर्गठन गरेका छन् ।
शुक्रबार प्रधानमन्त्री दाहालले कांग्रेस, नेकपा एकीकृत समाजवादी पार्टी, जनता समाजवादी पार्टी, लोकतान्त्रिक समाजवादी पार्टी र नागरिक उन्मुक्ति पार्टीलाई समेटेर मन्त्रिपरिषद् पुनर्गठन गरेका हुन् ।
शपथग्रहण गर्नेहरूमा पूर्णबहादुर खड्का उपप्रधान तथा रक्षा, प्रकाशशरण महत अर्थ, रमेश रिजाल उद्योग वाणिज्य तथा आपूर्ति र सीता गुरुङ शहरी विकासमन्त्री, शक्ति बस्नेत ऊर्जा, जलस्रोत तथा सिँचाइमन्त्री, वेदुराम भुसाल कृषि तथा पशुपक्षी विकास मन्त्री, प्रकाश ज्वाला भौतिक पूर्वाधार तथा यातायात मन्त्री, अशोक राई शिक्षा, विज्ञान तथा प्रविधि मन्त्री, शरत्सिंह भण्डारी श्रम, रोजगार तथा सामाजिक सुरक्षामन्त्री, रञ्जिता श्रेष्ठ चौधरी भूमि व्यवस्था, सहकारी तथा गरिबी निवारण मन्त्री र महिन्द्र राय यादव महिला, बालबालिका तथा ज्येष्ठ नागरिक मन्त्री रहेका छन्।
नवनियुक्त मन्त्रीहरूलाई राष्ट्रपति रामचन्द्र पौडेलले पद तथा गोपनीयताको शपथ गराएका छन्।
नेकपा एमाले र राष्ट्रिय प्रजातन्त्र पार्टीले समर्थन फिर्ता लिएपछि प्रतिनिधिसभामा फेरि विश्वासको मत प्राप्त गरेका प्रचण्डले साझेदार दलका शीर्षस्थ नेताहरूसँग भएको सहमतिअनुसार सरकारमा अहिले महत्त्वपूर्ण परिवर्तन गरेका हुन्।
तर अझै पनि मन्त्रिपरिषद्ले पूर्णता भने पाइसकेको छैन। परराष्ट्र र कानुनसहितका केही मन्त्रालय प्रधानमन्त्री आफैँले राखेका छन्।
प्रधानमन्त्रीले मन्त्रिपरिषद् पुनर्गठन गरेकै दिन पहिला गरिएको प्रतिबद्धताविपरीत उद्योग मन्त्रालय आफूलाई नदिइएको भन्दै जनमत पार्टी सरकारबाट अलग भएको छ।उक्त दलका अब्दुल खान यसअघि खानेपानी मन्त्री थिए। खानले नयाँ मन्त्रीहरूको शपथअघि प्रधानमन्त्री निवास बालुवाटारमा पुगेर राजीनामा बुझाएका थिए।
सरकारलाई समर्थन गरेको चौथो ठूलो दल राष्ट्रिय स्वतन्त्र पार्टी भने मन्त्रिपरिषद्मा सहभागी भएको छैन।
यसअघि एमाले, राष्ट्रिय स्वतन्त्र पार्टी र राप्रपासहितको समर्थनमा प्रचण्डको नेतृत्वमा सरकार गठन भएको थियो।
