काठमाडौँ- सत्ता गठबन्धनमा सरकारको न्यूनतम साझा कार्यक्रममाथि फेरि छलफल सुरू भएको छ । यसअघि एमालेसहितको गठबन्धनबाट न्यूनतम साझा कार्यक्रम तयार गरी सार्वजनिक भए पनि अहिले कांग्रेससहितको अर्को नयाँ गठबन्धन बनेपछि फेरि सरकारको न्यूनतम साझा कार्यक्रम तय गर्न लागिएको हो ।
बिहीबार गठबन्धनका नेताहरूबीच प्रधानमन्त्रीको सरकारी निवास बालुवाटारमा त्यसबारे छलफल भएको छ । छलफलमा कांग्रेसका प्रमुख सचेतक रमेश लेखक, एकीकृत समाजवादीका उपाध्यक्ष प्रमेश हमाल, जनता समाजवादी पार्टीका राजेन्द्र श्रेष्ठसहित नेताहरू सहभागी थिए ।
कांग्रेस मुख्य सचेतक लेखकले गठबन्धनमा मन्त्रिपरिषद् विस्तार र सरकारको न्यूनतम साझा कार्यक्रमका विषयमा एकै साथ छलफल अघि बढेको बताए ।
‘हामी सरकारको न्यूनतम साझा कार्यक्रममाथि छलफल गरिरहेका छौँ, शीर्ष नेताहरूबीच मन्त्रिपरिषद् विस्तारका विषयमा पनि छलफल चलिरहेको छ,’ उनले भने, ‘तर मन्त्रिपरिषद् विस्तारका विषयमा विस्तृतमा छलफल भइसकेको छैन । अझै केही दिन लाग्न सक्छ ।’
कांग्रेस सभापति शेरबहादुर देउवा र प्रधानमन्त्री पुष्पकमल दाहालबीच बिहीबार साँझ पनि भेटवार्ता भएको छ । देउवा प्रधानमन्त्री दाहाललाई भेट्न बालुवाटार नै पुगेका थिए । भेटमा मन्त्रिपरिषद् विस्तार र सरकार सञ्चालनका विषयहरूमा छलफल भएको निकट नेताहरूले जनाएका छन् ।
६ चैतमा विश्वासको मत लिएका प्रधानमन्त्री दाहालले मन्त्रिपरिषद् विस्तारको तयारी भइरहेको भनेका छन् । तर गठबन्धनमा मन्त्रालय बाँडफाँट टुंग्याउन नसक्दा मन्त्रिपरिषद् विस्तार हुन सकिरहेको छैन भने १६ वटा मन्त्रालयको कार्यभार प्रधानमन्त्रीको काँधमा छ ।
