काठमाडौँ - परराष्ट्रमन्त्री विमला राई पौड्याल जेनेभा भ्रमणमा नजाने भएकी छन्। प्रधानमन्त्री पुष्पकमल दाहाल प्रचण्डले उनलाई जेनेभा जान रोकेको बताइएको छ। उनी मानवअधिकार परिषद्को ५२ औं सत्रमा भाग लिन आइतबार साँझ जेनेभा जान लागेकी थिइन्।
परराष्ट्रमन्त्री पौड्यालनिकट स्रोतका अनुसार प्रधानमन्त्री प्रचण्डले आफैँ फोन गरेर परराष्ट्रमन्त्री पौड्याललाई भ्रमणमा नजानु भनेका हुन्। नेपाली कांग्रेससहित ८ राजनीतिक पार्टीको नयाँ गठबन्धन बनेपछि पौड्याललाई प्रधानमन्त्री प्रचण्डले जेनेभा जानबाट रोकेको बताइएको छ। परराष्ट्रमन्त्री पौड्याल नेकपा एमालेकी हुन्।
उनी जेनेभामा सहभागी हुने नेपाली टोलीको नेतृत्व गर्दै त्यता जान लागेकी थिइन्। उक्त नियमित सत्र फागुन १५ गतेदेखि चैत १३ गतेसम्म हुनेछ। नेपाल अहिले मानवअधिकार परिषद्को सदस्य रहेको छ।
मन्त्री पौड्यालले आइतबार दिउँसो पत्रकार सम्मेलन गर्दै परिषद्को ५२ औं सत्रमा नेपालले अहिलेसम्म गरेका काम र उपलब्धिहरू राख्ने बताएकी थिइन्। सम्मेलनमा उनले मन्त्रिपरिषद्कै निर्णयमा आफू जेनेभा जान लागेको पनि जानकारी दिएकी थिइन्।
