काठमाडौँ – पुस १० गते सरकार गठनका लागि बनेको सत्ता गठबन्धन भत्किएको छ । प्रधानमन्त्री निवास बालुवाटारमा बसेको ८ दलका शीर्ष नेताको बैठकले राष्ट्रपतिमा कांग्रेसलाई सहयोग गर्ने निर्णय गरेसँगै नयाँ गठबन्धन बनेको हो ।
प्रधानमन्त्री पुष्पकमल दाहालले नयाँ गठबन्धन बनेको बताउँदै यही गठबन्धनले समृद्धि हासिल गर्ने काममा लाग्ने बताएका छन्। बैठकमा प्रधानमन्त्री प्रचण्डले संसद्को सबैभन्दा ठूलो राजनीतिक दललाई नै राष्ट्रपति दिनुपर्ने प्रस्ताव गरेका थिए । अन्य सहभागी दलहरुले उनके प्रस्तावमा सहमती जनाएका थिए । सबै पार्टीले नेपाली कांग्रेसको उमेदवारलाई राष्ट्रपतिको निर्वाचनमा समर्थन गर्ने आजको बैठकले टुंगो लगाएको छ।
प्रधानमन्त्री निवास बालुवाटारमा भएको छलफलमा नेपाली कांग्रेस, नेकपा माओवादी केन्द्र, जनता समाजवादी पार्टी, एकीकृत समाजवादी पार्टी, राष्ट्रिय जनमोर्चा, लोकतान्त्रिक समाजवादी पार्टी, नागरिक उन्मुक्ति पार्टी र जनमत पार्टीका नेताहरुको बैठकले यस्तो निर्णय गरेको हो ।
राष्ट्रपतिकाे उमेदवार कांग्रेसले नै चयन गर्नेछ । कांग्रेसले राष्ट्रपति उमेदवार चयन गर्नका लागि शनिवार बिहान साढे ८ बजे कार्य सम्पादन समितिको बैठक बोलाएको छ ।
कांग्रेसमा रामचन्द्र पौडेल र कृष्णप्रसाद सिटौलाले दाबी गरेका छन् । राष्ट्रपतिमा कांग्रेस र नेकपा एकीकृत समाजवादीका अध्यक्ष माधवकुमार नेपालको पनि दाबी थियो । नेपालसँग प्रधानमन्त्री प्रचण्डले गरेको गोप्य छलफलपछि कांग्रेसलाई दिन तयार भएको एक नेताले जानकारी दिए ।
लोसपाका नेता राजेन्द्र महतोका अनुसार प्रधानमन्त्रीले यो गठबन्धन बनेपछि एमाले बाहिरिने संकेत बैठकमा गरेका थिए । ओलीसँगको छलफलपछि प्रधानमन्त्रीले यस्तो ब्रिफिङ गरेको उनको भनाई थियो ।
प्रधानमन्त्री प्रचण्डले नेकपा एमालेका अध्यक्ष केपी शर्मा ओलीले आफूसँगको भेटमा तीतो पोखेर गएको बताएका थिए । बर्तमान राजनैतिक घटनाक्रममा यो आजको बैठकले नयाँ मोड लिएको प्रचण्डको भनाई छ ।
उनले आठ राजनीतिक दलका नेताको बैठकमा ओलीसँगको भेटबारे ब्रिफिङ गरेका थिए । “एमाले अध्यक्ष ओलीले मसँगको भेटमा तीतो पोखेर गए,” प्रधानमन्त्रीको भनाई उद्धृत गर्दै बैठकमा सहभागी एक नेताले भने ।
उनका अनुसार प्रधानमन्त्री प्रचण्डले अब नयाँ गठबन्धन बनेको र सरकार गठनका बेला बनेको गठबन्धन टुटेको ब्रिफिङ गरेका थिए ।
