काठमाडौं- सत्ता गठबन्धनमा आबद्ध पाँच दलका शीर्ष नेताहरूको आइतबारको बैठकले भोलीको लागि अर्को बैठक बस्ने निर्णय मात्र गरेर टुंगिएको छ। उनीहरूले आसन्न निर्वाचनका लागि गठबन्धनभित्र सिट फाँडफाँटको टुंगो लगाउन निकै सकस भएको छ । प्रधानमन्त्रीको सरकारी निवास बालुवाटारमा बसेकाे बैठकमा लामो छलफल भए पनि निचोड निस्कन सकेन।
बैठक भोलि बिहान पुनः बस्ने नेकपा (एकीकृत समाजवादी)का सम्मानित नेता झलनाथ खनालले जानकारी दिए । उनका अनुसार सोमबार बिहान ८ बजे बालुवाटारमै बैठक बस्नेछ ।
सोमबार बस्ने शीर्ष नेताहरूको बैठकबाट सिट बाँडफाँटका विषयमा सहमति जुटाउने प्रयास गरिने उनले बताए ।
“आज लामो छलफल भयो । तर, सिट बाँडफाँटको विषयमा सहमति जुटेन,” उनले भने, “भोलि बालुबाटारमा ८ बजे शीर्ष नेताहरूको बैठक बस्नेछ । आवश्यकताअनुसार कार्यदलका साथीहरूलाई पनि बोलाइनेछ । हामी सहमतिमा पुग्छौँ ।”
सिट बाँडफाँटमा ५० प्रतिशत कुरा मिलिसकेको उनको भनाइ छ ।
सिट बाँडफाँटको टुंगो लगाउन यसअघि शीर्ष नेताले कार्यदल गठन गरी जिम्मा दिएका थिए । तर, कार्यदल ठोस सहमति जुटाउन असफल भएको थियो ।
