काठमाडौं – निर्वाचन आयोगले प्रतिनिधि र प्रदेश सभा निर्वाचनका लागि चार मतपत्र प्रयोग हुने जनाएको छ । एक मतदाताले चार मतपत्र लिएर मतदान गर्नुपर्ने छ ।
‘एक मतदाताले प्रतिनिधि सभातर्फ प्रत्यक्ष र समानुपातिक गरी दुई मतपत्र तथा प्रदेशसभातर्फ पनि सोहीअनुसार गरी चार मतपत्रमा मतदान गर्नुपर्छ,’ आयोग सहप्रवक्ता सूर्यप्रसाद अर्यालले जानकारी दिए ।
आयोगले आगामी २ असोजमा दलले उम्मेदवारको बन्दसूची बुझाएपछि ३ अथवा ४ असोजबाट मतपत्र छपाइ सुरु गर्ने योजना बनाएको छ ।आगामी ४ मंसिरका लागि तय प्रतिनिधि सभा र प्रदेश सभा निर्वाचनमा ५ सय ३ प्रकारका मतपत्र प्रयोग हुने भएको छ ।
आयोग प्रवक्ता शालिग्राम शर्मा पौडेलले प्रतिनिधिसभा प्रत्यक्ष निर्वाचन प्रणालीतर्फ प्रत्येक क्षेत्रमा फरकफरक, प्रदेश सभा निर्वाचन क्षेत्रमा प्रत्यक्षतर्फ प्रत्येक प्रदेश सभा निर्वाचन क्षेत्रमा फरक, सातै प्रदेशको समानुपातिकतर्फ प्रत्येक प्रदेशमा फरक तथा प्रतिनिधि सभातर्फको पुरै देशलाई ‘एक निर्वाचन क्षेत्र’ मान्ने समानुपातिक निर्वाचन प्रणालीतर्फ पनि छुट्टै प्रकारको मतपत्र प्रयोग हुने जानकारी दिए ।जसअनुसार प्रतिनिधि सभा प्रत्यक्षतर्फ १ सय ६५ निर्वाचन क्षेत्रमा १ सय ६५ प्रकारकै मतपत्र प्रयोग हुनेछ ।
त्यस्तै, ३ सय ३० प्रदेश सभा निर्वाचन क्षेत्रमा ३ सय ३० प्रकारकै मतपत्र र सात प्रदेश सभाका समानुपातिक निर्वाचन प्रणालीका लागि ७ प्रकारका तथा प्रतिनिधि सभा समानुपातिक निर्वाचन प्रणालीतर्फ एक प्रकारको मतपत्र प्रयोग हुने छ ।
आयोगले पहिलो हुने निर्वाचित हुने प्रणालीतर्फ जुन पार्टीका उम्मेदवार जुन क्षेत्रमा उठेका छन्, सो उम्मेदवारको निर्वाचन चिह्न मात्र मतपत्रमा समावेश गरिने बताएको छ ।
त्यस्तै, प्रतिनिधि तथा प्रदेश सभा समानुपातिकतर्फ बन्दसूचीमा उम्मेदवारी दिने दलको मात्रै निर्वाचन चिह्न मतपत्रमा समावेश गरिने भएको छ ।
