काठमाडौं – ललितपुर महानगरपालिकामा बसोबास गर्ने ज्येष्ठ नागरिकले बार्षिक दश हजार चाडबाड भत्ता पाउने भएका छन् ।
ज्येष्ठ नागरिकले चाडपर्व हाँसीखुसी मनाउन पाउन् भनी महानगरपालिकाले उक्त काम अघि बढाउने भएको हो ।
उमेर ढल्केका वृद्धवृद्धाको अवस्थालाई मध्यनजर गरी प्रत्येक बडादशैँ ताका वर्षको एकपटक रु १० हजार भत्ता दिने निर्णय भइसकेको छ ।
जेष्ठ नागरीकलाई चाडपर्व मनाउन सन्तानसँग हात थाप्नु नपरोस् भनी यस कामलाई महानगरपलिकाले अघि बढाएको हो । महानगरपालिकाले गत वर्षसम्म पाँच हजार रुपैँया दिने गरेकामा यस वर्ष अरु पाँच हजार थप गरी रु १० हजार दिने भएको छ । महानगरपालिकामा लगभग सात हजार ज्येष्ठ नागरिक रहेका बताइएको छ ।
यसैगरी ‘ज्येष्ठ नागरिकसँग महानगरपालिका’ कार्यक्रमअन्तर्गत कार्यविधि बनाएर बिरामी पर्दा उहाँहरूको सेवा र रेखदेखमा खटिने मानिस अभाव भएको जानकारी पाएमा मेडिकल समूह गठन गरी घर–घरमा उपचारका लागि पठाउने विषयतर्फ पनि महानगरपालिकाले कार्ययोजना बनाएर अघि बढ्ने सोच बनाएको छ।
महानगरपलिकाले हरेक घर धुरी सम्म आफ्नो पहँुचलाई सहज बनाउन जिपिएस प्रणालीको प्लेटहरु हरेक घरमा जडान गर्दैछ । प्लेट जडान सम्पन्न भएसँगै जिपीएस प्रणालीमार्फत हरेक व्यक्तिको घर पत्ता लगाउन सजिलो हुनेछ । महानगरमा ९० प्रतिशत घरमा जिपिएस नम्बरप्लेट जडानको काम सम्पन्न भइसकेको छ । “महानगरपालिकामा कुल ८१ हजार घर सङ्ख्या छन् ।
