काठमाडौं – सत्ता गठबन्धनका शीर्ष नेताबीच चुनावी तालमेल गरेर जाने सहमति भएको छ । बालुवाटारमा आज बसेको गठबन्धनको बैठकले भदौ पहिलो साता तालमेलको काम सम्पन्न गर्ने निर्णय गरेको एकीकृत समाजवादीका सम्मानित नेता झलनाथ खनालले जानकारी दिए ।
“चुनावमा तालमेल गरेर जाने निर्णय भएको छ । भदौको पहिलो साता तालमेलको निर्णय सक्ने कुरा भएको छ,” उनले भने, “तालमेका लागि प्रत्येक दलबाट सहभागी हुने गरी समिति बनाउने निर्णय भएको छ ।”
खनालका अनुसार उक्त समिति आजै बन्नेछ । समितिमा प्रत्येक दलबाट कम्तिमा दुई सदस्य रहने छन् ।
गठबन्धनको बैठकले एक बिज्ञप्ति पनि सार्वजनिक गरेको छ । जसमा नेपाली कांग्रेको तर्फबाट सभापति शेर बहादुर देउवा, नेकपा माओबादी केन्द्रको तर्फबाट अध्यक्ष पुष्पकमल दाहाल प्रचण्ड, नेकपा एकीकृत समाजबादीको तर्फबाट अध्यक्ष माधव कुमार नेपाल , जनता समाजबादीको तर्फबाट अध्यक्ष उपेन्द्र यादव , राष्टिय जनमोर्चाको तर्फबाट अध्यक्ष दुर्गा पौडेलले हस्ताक्षर गरेका छन् ।
