काठमाडौं –भारतको १५औँ राष्ट्रपतिमा द्रौपदी मुर्मू निर्वाचित भएकी छन् । सत्तारूढ राष्ट्रिय लोकतान्त्रिक गठबन्धन (एनडीए)की उमेदवार मुर्मू राष्ट्रपतिमा विजयी भएकी हुन् । जितसँगै उनी देशको सर्वोच्च पदमा पुग्ने पहिलो आदिवासी नेतृ बनेकी छन् ।
उनी कांग्रेस सहितको विपक्षी दलले राष्ट्रपतिमा अघि सारेको तृणमुल कांग्रेसमा रहेका पूर्वभाजपा नेता यशवंत सिन्हालाई भारी मतान्तरले पराजित गर्दै राष्ट्रपति चुनिएकी हुन् । उनलाई जितका लागि ५ लाख ४३ हजार २ सय १६ मतमूल्य चाहिएकोमा उनले ५ लाख ७७ हजार ७ सय ७७ मतमूल्य प्राप्त गरी विजयी भएकी हुन् ।
भारतको संवैधानिक प्रावधानअनुसार केन्द्रीय सांसद र विधानसभा सदस्यहरुको कुल मत मूल्य १० लाख ८६ हजार ४ सय ३१ को ५० प्रतिशत कटाउने उम्मेदवार विजयी हुन्छन् । मुर्मूले ७२ प्रतिशत मत प्राप्त गरेकी छन् । उनका प्रतिद्वन्द्वी सिन्हाले २ लाख ६१ हजार ६२ मत मूल्य प्राप्त गरेका छन् ।
झारखण्डकी पूर्वगभर्नर ६४ वर्षीया मुर्मू धेरै चिजहरूका लागि परिचित छिन्– अडान लिन सक्ने, आदिवासी अधिकारका लागि वकालत गर्ने, प्रशासनिक सिप र आध्यात्मिकता तथा विनम्रताकाे लागि चिनिन्छिन् ।
मुर्मूसँग काम गरेका र चिन्नेहरूले उनको बारेमा मायालुभावले कुरा गर्छन् । ‘कहिल्यै रबर–छाप गभर्नर नभएको’ र आदिवासी कल्याणका लागि सच्चा अधिवक्ताको रूपमा उनको वर्णन गर्छन् ।
काउन्सिलरदेखि राष्ट्रपतिसम्मको मुर्मूको यात्रा, १९९७ देखि २०२२ सम्मको २५ वर्षको अवधिमा हासिल गरेकाे उपलब्धिले धेरैलाई प्रेरणा दिन सक्छ ।
विवादरहित छविका कारण ओडिशा मूल निवासी मुर्मूले २००७ मा राज्य विधानसभाबाट सर्वश्रेष्ठ विधायकको लागि नीलकण्ठ पुरस्कार पाएकी थिइन् ।
उनी भ्रष्टाचारका आरोपबाट परै रहिन् र गभर्नरको रूपमा उनको कार्यकाल समाप्त भएपछि (२०२१) मा मयुरभञ्ज जिल्ला (ओडिशा) मा रहेको आफ्नो गाउँ उपरबेदा फर्किइन् । आदिवासी जनजातिको लागि काम जारी राख्न उनी सधै सक्रिय रहिन ।
आगामी २५ जुलाईमा उनले शपथ ग्रहण गर्ने छिन् । सर्वोच्च अदालतका मुख्यन्यायाधीशबाट उनले शपथ लिने छिन् । भाजपाले यसअघि दलित समुदायकै कोविंद र त्यसअघि अटल बिहारी बाजपेयीको समयमा चर्चित वैज्ञानिक अब्दुल कलामलाई राष्ट्रपति बनाएको थियो ।
