काठमाडौं – अभिनेत्री प्रियंका कार्की चलचित्रमा फेरि नायिकाका रूपमा फर्कने तयारीमा छिन् । उनी पछिल्लो समय आफ्नो तौल घटाउन निकै सक्रिय छिन् ।
‘मैले आफ्नो तौल घटाउनका लागि खाना र व्यायाम दुवैमा ध्यान दिएको छु । अहिले दिनमा दुई घण्टासम्म कडा व्यायाम गरिरहेको छु ।’ अभिनेत्री प्रियंकाका अनुसार उनलाई बिजु पार्कीले व्यायाम गराइरहेका छन् । पार्कीले आफूलाई जिम्नास्टिक, जुम्बा र किकबक्सिङ जस्ता कार्य गराएर तौल घटाउन सहयोग पु-याएको अभिनेत्री प्रियंकाले बताएकी छन् । योबाहेक उनले कार्बोहाइड्रेड र चिनीजन्य खाना छाडेर १६ घन्टे किटो डाइट गरिरहेकी छन् । उनको यो प्रोटिन डाइटले पनि आफूलाई छोटो समयमा तौल घटाउन निकै सघाएको अभिनेत्रीले प्रियंकाले बताएकी छन् ।
अभिनेत्री प्रियंकाको भनाइमा उनले यो दुई महिनामा २४ केजी तौल घटाएकी छन् । अभिनेत्री प्रियंकाले पत्रकारसँग भनेकी छन्, ‘सुत्केरीको बेला म ९४ केजीको थिएँ र अहिले तौल घटाएर ७० केजीको भएकी छु । आझै ५ देखि ७ केजीसम्म घट्ने योजनामा छु ।’
सन्तान जन्मने भएपछि अभिनेत्री प्रियंका कार्कीले फिल्मको काम छाडेकी हुन् । यति बेला उनी नयाँ टेलिचलचित्रको छायांकनमा छिन् । अब चाँडै चलचित्रमा पनि नायिकाका रूपमा आउने उनले बताएकी छन् । सोही कारण आफूले तौल घटाएको पनि अभिनेत्रीले बताएकी छन् ।
