काठमाडौं – प्रमुख प्रतिपक्षी दल नेकपा एमालेले प्रधानमन्त्री शेरबहादुर देउवाको आसन्न अमेरिका भ्रमणको विषयमा सरकारको जवाफ मागेको छ ।
प्रतिनिधि सभाको आइतबार बसेको बैठकमा एमाले उपमहासचिव प्रदीप ज्ञवालीले सत्तापक्षका प्रमुख सचेतकले विषय उठाएको बारे प्रधानमन्त्रीको जवाफ माग गरेका हुन् ।नेकपा एमाले संसदीय दलका प्रमुख सचेतकले बिहीबार संसदमा रक्षा मन्त्री समेत रहेका प्रधानमन्त्री देउवाको भ्रमणमा राष्ट्रिय सुरक्षा संम्बन्धी विषयमा बोलेका थिए । त्यो विषयलाई लिएर एमालेले शुक्रबार पनि संसदमा प्रधानमन्त्रीको जवाफ मागेको थियो ।
‘सत्ता पक्षका प्रमुख सचेतकले प्रधानमन्त्रीको अमेरिका भ्रमण रोक्न आग्रह गरेको कुरालाई हामीले कसरी बुझ्ने । यो विषयमा सदन अनुत्तरित रहनु हुँदैन भन्ने लाग्छ’ पूर्व परराष्ट्रमन्त्री समेत रहेका ज्ञवालीले भने ।
प्रधानमन्त्रीको भ्रमणबारे प्रमुख प्रतिपक्षी दल बेखबर रहेको र देउवाको अमेरिका भ्रमण प्रधानमन्त्री या रक्षामन्त्रीको हैसियतमा हुन लागेको भन्दै ज्ञवालीले प्रश्न गरे । ‘प्रधानमन्त्रीको भ्रमण आधिकारिक हो कि सद्भाव मात्र हो ? त्यहाँ के समझदारी हुन्छन् त्यसबारे सदन जान्न चाहन्छ’ ज्ञवालीले भने ।
