मनाङको नासों गाउँपालिका अध्यक्षमा नेपाली कांग्रेसका धनबहादुर गुरुङ विजयी भएका छन् । उनले ८२० मत प्राप्त गरे । निकटतम प्रतिस्पर्धी नेकपा एमालेका उम्मेदवार मनबहादुर गुरुङले ६४६ मत ल्याए ।
ङिस्याङ गाउँपालिकामा नेकपा (एमाले)का उमेदवार विजयी भएका छन् । स्थानीय तह निर्वाचनअन्तर्गत शनिबार सम्पन्न मतगणना अनुसार गाउँपालिकाको अध्यक्ष पदमा एमालेका उमेदवार विजयी भएका हुन् ।
जिल्ला निर्वाचन अधिकारी पुष्पराज शर्माका अनुसार गाउँपालिकाको अध्यक्षमा एमालेका कान्छा घले ८६१ मतका साथ विजयी भए । उनका निकटतम प्रतिस्पर्धी नेपाली कांग्रेसका उमेदवार छिरिङ ओङमा गुरुङ (घले)ले ७१३ मत ल्याइन् ।
हिमालपारिको जिल्ला मुस्ताङको वारागुङ मुक्तिक्षेत्र गाउँपालिकाको अन्तिम मतपरिणाम सार्वजनिक भएको छ । सहायक निर्वाचन अधिकृत जीतबहादुर राणाका अनुसार यहाँ नेकपा (एमाले)का उमेदवार विजयी भएका छन् ।
राणाका अनुसार गाउँपालिकाको अध्यक्ष पदमा एमालेका रिन्जिन नमग्याल गुरुङ ८७६ मत ल्याउँदै विजयी भए । दोस्रो स्थानमा रहेका नेपाली कांग्रेसका उमेदवार अनजेल गुरुङले ५७७ मत पाए ।
रोल्पाको माडी गाउँपालिकामा–१ मा नेकपा (माओवादी केन्द्र)का उमेदवार विजयी भएका छन् । माओवादी उमेदवारले नेपाली कांग्रेस, नेकपा (एमाले) र नेत्रविक्रम चन्द ‘विप्लव’ नेतृत्वको नेकपासहितको गठबन्धनलाई पराजित गरेका हुन् ।
वडाध्यक्षमा रोहित घर्तीमगर विजयी भए । उनले ८९० मत प्राप्त गर्दा एमाले उमेदवारले ८४५ मत पाए । ८४ मत बदर भयो । वडामा माओवादीको प्यानलै विजयी भएको छ ।
स्याङ्जाको हरिनास गाउँपालिका–१ मा नेपाली काग्रेसका इन्द्रबहादुर गुरुङ विजयी भएका छन् । नेपाली कांग्रेस र नेकपा (माओवादी केन्द्र)बीच गठबन्धन रहेको उक्त वडामा विजयी भएका गुरुङले ८०४ मत प्राप्त गरेका हुन् ।
उनका निकटतम प्रतिस्पर्धी नेकपा (एमाले)का मिलनराज श्रेष्ठले ५४२ मत प्राप्त गरे । दुई वडाध्यक्षका बीचमा २६२ को मतान्तर रहेको छ ।
पाल्पाको पूर्वखोला गाउँपालिका वडा नं १ सिलुवामा नेकपा एमालेको प्यानलै विजयी भएको छ।
गाउँपालिका अध्यक्षमा नेकपा एमालेले एक हजार ४४१ मत प्राप्त गर्दा नेकपा एकीकृत समाजवादीका उम्मेदवारले ४०१ मत प्राप्त गरेका छन्। गाउँपालिका उपाध्यक्षमा नेकपा एमालेले एक हजार ४७७ मत प्राप्त गरेको छ भने कांग्रेसले ४८४ मत प्राप्त गरेको छ। वडाध्यक्षमा पनि एमाले नै विजयी भएको छ। एमालेले एक हजार ४८८ मत प्राप्त गर्दा कांग्रेसले ४८६ मत प्राप्त गरेको छ।
