काठमाडौं – सत्ता गठबन्धनले गठबन्धन विपरित महानगर र उपमहानगरमा दिएको उम्मेदवारी सम्बन्धित दलले फिर्ता गर्ने निर्णय गरेको छ । सत्ता गठबन्धनको बुधबार प्रधानमन्त्री निवास बालुवाटारमा बसेको बैठकले गठबन्धनको निर्णयविपरीत गठबन्धन भित्रका दलको तर्फबाट दर्ता भएका उम्मेदवारीलाई मान्यता दिन नसक्ने भएकोले सम्बन्धित दलले फिर्ता गर्ने निर्णय गरेको हो ।
यस्तै, बैठकले गठबन्धनभित्रका दलका सदस्यले स्वतन्त्र हैसियतमा दर्ता गरेका उम्मेदवारीहरु फिर्ता गराउन सम्बन्धित दलले आवश्यक कार्य गर्ने निर्णय गरेको छ । ६ महानगर र ११ उप–महानगरपालिकामा गठबन्धनको प्रदेश र जिल्ला संयन्त्रको बैठक आजै राखेर वडाका विभिन्न पदहरुमा गठबन्धनभित्रका दलहरुका बीचमा सिट बाँडफाँटको सम्झदारी गर्ने पनि निर्णय गरेको छ ।
नगरपालिका र गाउँपालिकाहरुमा गठबन्धनका दलहरुका बीचमा भइसकेको सिट बाँडफाँट समझदारीविपरित गठबन्धनभित्रका दलहरुबाट दर्ता भएका उम्मेदवारीहरु फिर्ता गर्ने सहमति भएको छ । गठबन्धनभित्रका दलका सदस्यले स्वतन्त्र हैसियतमा दर्ता गराएका उम्मेदवारी फिर्ता गराउन सम्बन्धित दलले आवश्यक कार्य गर्ने निर्णय गरेको छ ।
गठबन्धनका दलहरुका बिचमा सिट बाँडफाँटको समझदारी हुन नसकेका नगरपालिका, गाउँपालिका र तिनका वडाहरु स्थानीय र प्रदेश सयन्त्रले समझदारीका लागि आवश्यक कार्य गर्ने निर्णय गरेको छ। त्यसका निमित्त स्थानीय, जिल्ला र प्रदेश संयन्त्रले केन्द्रीय संयन्त्रसँग आवश्यक परामर्श र सहयोग लिने भएको छ ।
गठबन्धनभित्रका दलहरुले कुनै पनि तहमा गठबन्धन बाहेकका दलसँग तालमेल नगर्ने र तालमेल गरेको ठाउँमा सम्बन्धित दलले अविलम्ब खारेज गर्ने भएको छ ।
