काठमाडौं- चिनियाँ सरकारले अनुदानमा निर्माण गरिदिने घोषणा गरेको चक्रपथ सडकअन्तर्गत कलंकी चावहिल खण्डको साइट क्लिअरको काम सम्पन्न भएको छ ।
स्वयम्भू र सानो भर्याङमा रहेका दुईवटा ६६ केभीको बिजुलीका टावर नेपाल विद्युत् प्राधिकरणले हटाएसँगै अब दोस्रो खण्ड विस्तारका लागि चिनियाँ पक्षलाई काम सुरु गर्न बाटो खुला भएको हो ।
प्राधिकरणले बिजुलीका टावर हटाएसँगै दोस्रो खण्डको चक्रपथ विस्तारका लागि साइट क्लियरिङको काम लगभग सम्पन्न भएको हो ।
चक्रपथ विस्तारअन्तर्गत दोस्रो सडकखण्डमा नेपालले पहिला साइट क्लिअर अर्थात् रुख, पोल र ढल हटाउनुपर्ने सम्झौतामा उल्लेख छ । त्यसपछि मात्र चिनियाँ पक्षले सडक विस्तार गर्ने सम्झौतामा उल्लेख छ । जसअनुसार चक्रपथको चौडाइ बीचबाट दुवैतर्फ २५–२५ मिटर हुनुपर्नेछ । थप ६–६ मिटरमा नेपालले सर्भिस ट्रयाक बनाउनुपर्ने हुन्छ ।
चिनियाँ पक्षको यसअघिको स्थलगत निरीक्षणको क्रममा शतप्रतिशत साइट क्लिअर नभएपछि चिनियाँ पक्षले सडक विस्तारको काम सुरु गर्न आनाकानी गर्दै आएको थियो ।
चार सदस्यीय चिनियाँ प्राविधिक टोलीले विस्तार गरिने कलंकीदेखि महाराजगन्जसम्मको करिब ८.५ किमी सडकको स्थलगत अध्ययन गरेर साइट क्लिअर भएको प्रतिवेदन चीनको हेनान प्रोभेन्सियल कम्युनिकेसन प्लानिङ सर्भे एन्ड डिजाइन इन्स्टिच्युट कम्पनीलाई दिएसँगै कम्पनीले काम थाल्ने जनाइएको थियो । तर, चिनियाँ प्राविधिक टोली निरीक्षणपछि विस्तार गरिने सडकको साइट क्लिअर नभएको रिपोर्ट बोकेर फर्कन बाध्य भएको थियो । पहिलो खण्ड अन्तर्गत कलंकी कोटेश्वर सडक सम्पन्न गरि नेपाल सरकारलाई हस्तान्तरण गरेको चिनियाँ सरकारले दोश्रो खण्ड अन्तर्गत कलंकी देखि चावहिल सम्म भनिए पनि एसपटक महाराजगन्ज सम्ममात्र चक्रपथ निर्माण गरिने भएको छ ।
चक्रपथ विस्तारअन्तर्गत महाराजगन्जमा २ सय ४० मिटर खण्डको क्षेत्रको मुआब्जा विवाद टुंगिन सकेको छैन । सडक विभागका प्रमुख शिवहरि सापकोटाले उक्त विवाद टुंगिन बाँकी रहेको बताउँछन् । दोस्रो खण्डअन्तर्गत पहिले चावहिलसम्म करिब साढे ११ किमी सडक विस्तार गर्ने भनिए पनि अहिले ८.५ किमी सडक विस्तार गर्ने भएपछि उक्त क्षेत्र तेस्रो चरणमा पर्ने देखिएकाले अहिले सडक विस्तार गर्न समस्या नरहने भएको छ ।
नेपाल सरकारले १८ पुस २०७६ मा नै उक्त खण्डको सडक सीमा ३१–३१ मिटर कायम गर्न आवश्यक पर्ने जग्गा अधिग्रहणका लागि स्वीकृति दिइसकेको छ । तर, अझै हल हुन सकेको छैन । सरकार पनि विवादित विषय हल गर्नेमा गम्भीर नबनेको पाइएको छ ।
