नेपाली कांग्रेसमा स्थानीय तह निर्वाचनमा महानगरपालिका र उपमहानगरपालिकामा उमेदवार चयन गर्ने विषयमा छलफल

काठमाडौं- बैसाख ३

नेपाली कांग्रेसमा आसन्न स्थानीय तह निर्वाचनमा महानगरपालिका र उपमहानगरपालिकामा उमेदवार चयन गर्नेलगायत विषयमा छलफल भएको छ ।

शनिबार पार्टी कार्यालय सानेपामा बसेको केन्द्रीय कार्यसम्पादन समितिको बैठकमा उमेदवार चयनको मापदण्ड, चुनावी तालमेललगायत विषयमा छलफल भएको नेता एनपी साउदले जानकारी दिए ।

“धेरै कुरामा छलफल भयो । महानगर र उपमहानगरमा कसरी उमेदवार चयन गर्ने भन्ने छलफल भयो,” उनले भने ।

पार्टीको केन्द्रीय समितिले चुनावी तालमेलसम्बन्धी निर्णय गरिसकेको भन्दै उनले तालमेल स्थानीय आवश्यकताअनुसार हुनुपर्नेमा जोड दिएका थिए । “स्थानीय समितिहरूले त्यो आवश्यकतालाई सबभन्दा राम्रोसँग बुझ्छन् । माथिबाट निर्णय लाद्नु हुँदैन,” उनले बैठकमा भनेका थिए ।

नेता अर्जुननरसिंह केसीले भने निष्पक्ष, पारदर्शी र उपयुक्त ढंगले उमेदवार चयन गर्नुपर्ने बताए । उमेदवार चयनका विषयमा पार्टीभित्र सहमति हुनुपर्ने उनको भनाइ थियो ।”गठबन्धन आफ्नो ठाउँमा, तालमेल आफ्नो ठाउँमा छँदै छ । सबभन्दा पहिला नेपाली कांग्रेसका तमाम कार्यकर्ता र नेतृत्वले सहमति खोज्ने कि विनाश रोज्ने भन्ने कुरामा गम्भीर हुनुपर्ने आवश्यकता छ,” उनले बैठकमा भनेका थिए, “निष्पक्ष, पारदर्शी र उपयुक्त ढंगले चयन गर्ने कुरातिर केन्द्रित हुनुपर्ने आवश्यकता छ ।”

उनले चुनावी तालमेलका विषयमा प्रस्ट खाका आउनुपर्ने भन्दै  तालमेलको निश्चित मापदण्ड के हो ? भनी प्रश्न गरेका थिए । “धेरै ढिलो नगरौँ । हरेक तहमा सहमतिपूर्ण निकास निकाल्नका निम्ति कार्ययोजना र निश्चित मापदण्ड चाहिन्छ,” उनले बैठकमा भने ।

सभापति शेरबहादुर देउवाले सत्ता गठबन्धनका दलबीच चुनावी तालमेल गर्ने निर्णय भइसकेको भन्दै सोहीअनुसार अघि बढ्नुपर्नेमा जोड दिएको नेता साउदले जानकारी दिए ।

भरतपुर महानगरपालिकाका विषयमा पार्टीभित्र नयाँ प्रस्ताव

नेपाली कांग्रेसका महामन्त्री विश्वप्रकाश शर्माले भरतपुर महानगरपालिकाका विषयमा पार्टीभित्र नयाँ प्रस्ताव अगाडि सारेका छन् ।  उनले ‘नयाँ र तेस्रो विकल्प’ भन्दै ‘मित्रवत् प्रतिस्पर्धा’को प्रस्ताव गरेका हुन् ।

०७४ को स्थानीय तह निर्वाचनमा कांग्रेसले भरतपुर महानगर नेकपा (माओवादी) केन्द्रलाई छाडेको भन्दै यो पटक माओवादीले कांग्रेसलाई सघाउनुपर्ने पार्टीका नेता-कार्यकर्ताहरूको मत रहेको उनले बताए । त्यसो हुन नसकेमा नयाँ र तेस्रो विकल्पमा जानुपर्नेमा उनले जोड दिए ।

“नयाँ र तेस्रो विकल्प भनेको दुवैले नछाड्ने अर्थात् मित्रवत् प्रतिस्पर्धा,” उनले बैठकमा भनेका थिए ।

देशभर एक्लै लड्नुपर्छ भन्नेमा आफू रहे पनि पार्टीको निर्णय स्वीकार गरेर अघि बढेको उनले बताए । “स्थानीय स्थिति, स्थानीय भावना र स्थानीय आवश्यकताले भन्छ– भरतपुरको मेयर कांग्रेसको बन्नुपर्छ, तालमेल भए तालमेलबाट नभए मित्रवत् प्रतिस्पर्धा,” उनले भने ।