सात दिन भित्र अनुसन्धान सकिने, शैक्षिक बातावरण सामान्य बन्दै

मोरङ,चैत्र २१,

लेटाङ घटनाको सम्पूर्ण अनुसन्धान अबको सात दिनभित्र सकिने प्रहरीले जनाएको छ । जिल्ला प्रहरी कार्यालय मोरङमा पदभार ग्रहण गर्न आएका प्रहरी उपरीक्षक शान्तिराज कोइरालाले सबै तथ्य संकलन गरी अनुसन्धान पूरा गर्न अब बढीमा एक साता लाग्ने बताए ।

घटनामा संलग्न भएको आरोपमा पक्राउ परेका ६३ जनाको म्याद थप भई प्रहरी हिरासतमा छन् । प्रहरी उपरीक्षक कोइरालाले २० जनाविरुद्ध कर्तव्य ज्यान मुद्दामा जिल्ला अदालत मोरङबाट म्याद थप भएको बताएका छन् । बाँकी ४३ जनाविरुद्ध अभद्र व्यवहार सम्बन्धी मुद्दामा अनुसन्धान भइरहेको छ । पक्राउ परेकामध्ये १० जना विद्यार्थी छन् । कोइरालाले भने, “अब बढीमा सात दिनभित्र सबै अनुसन्धान पूरा भएर मुद्दा अघि बढ्छ ।”

लेटाङ नगरपालिकाका मेयर शंकर राईले अवस्था सामान्य भएसँगै विद्यालय पूवर्वत रुपमा खोलिएको जानकारी दिएका छन् । उनका अनुसार कक्षा सुरु गरिएको छ । विद्यालय खुलेपछि त्रासदीपूर्ण घटनालाई बिर्सिएर विद्यार्थी विद्यालय आउन सुरु गरेका छन् ।

वार्षिक परीक्षा नजिकिएको र विद्यालय बन्द हुँदा पठनपाठनसमेत प्रभावित बनेको थियो । शिक्षक मनोज पौडेलले कक्षा ७ मा अध्ययनरत छात्रालाई होलीका दिन यौनजन्य दुरव्यवहार गरेको आरोप पछि विद्यार्थी र स्थानीयले प्रदर्शन गरेका थिए । मेयर राईले विद्यार्थीमा त्रासको अवस्था रहन नदिन प्रयास गरिएको बताउँदै भने, “हामीले विद्यार्थी र शिक्षकका लागि मनोपरामर्श कक्षा संचालन गर्ने तयारी गरेका छौं ।” घटनापछि स्थानीय रुपमा गठित पाँच सदस्यीय समितिले विद्यालयमा तोडफोडबाट भएको क्षतिको विवरण संकलन गरेको छ ।

त्रासका कारण मनोवैज्ञानिक असर देखिएकी कक्षा १० की एक छात्रालाई अस्पताल भर्ना गरेर उपचार गरिएको मेयर राईले जानकारी दिए । घटनामा घाइते विद्यार्थीको स्वास्थ्य अवस्थासमेत सुधार भइसकेको बताइएको छ । हिंसा भड्किएपछि प्रहरीले पाँच राउन्ड हवाई फायर गरेको थियो । एक दर्जनभन्दा बढी अश्रुग्यास प्रहार भएको थियो । झडपमा २९ प्रहरी र केही शिक्षक घाइते भएका थिए ।