काठमाडौं,चैत्र १८, स्मार्ट अक्षर संम्वाददाताः
प्रधानमन्त्री शेरबहादुर देउवा तीनदिने औपचारिक भ्रमणका लागि आज शुक्रबार भारत भ्रमणमा जाँदैछन्। भारतीय समकक्षी नरेन्द्र मोदीको निमन्त्रणामा नयाँ दिल्ली जान लागेका देउवाको भ्रमणका क्रममा लामो समयदेखि संवादहीन अवस्थामा रहेको सीमा विवाद, व्यापार तथा लगानी, ऊर्जा, कनेक्टिभिटी, दुई पक्षीय संयन्त्रहरूको सञ्चालन तथा बिटुबी र पिटुपी सम्बन्धजस्ता विषयलाई प्राथमिकतामा राखिएको छ।
नेपालको प्राथमिकतामा परेका विषय भारतको प्राथमिकतामा पर्छन् वा पर्दैनन् भन्ने निश्चित नभएकाले नेपालको अजेन्डा के हुन्छ भन्ने सार्वजनिक गरिएको छैन। ‘हाम्रो प्राथमिकतामा धेरै कुरा छन्। हाम्रो प्राथमिकता र अजेन्डामा परेका विषयमा भारत छलफल गर्न सहमत हुन्छ भन्ने छैन। त्यसैले अहिले नै यही विषयमा छलफल हुने भन्ने अवस्था छैन,’ परराष्ट्र मन्त्रालयका एक उच्च अधिकारीले भने।
प्रधानमन्त्री देउवाको साथमा उनकी पत्नी आरजु, परराष्ट्रमन्त्री नारायण खड्का, ऊर्जामन्त्री पम्फा भुसालसहित उच्चस्तरीय भ्रमणमा जाँदैछन्। देउवाले गत असारमा प्रधानमन्त्रीको जिम्मेवारी सम्हालेपछि हुन लागेको यो पहिलो भारत भ्रमण हो। यसअघि उनी जलवायु परिवर्तनसम्बन्धी विश्व नेताहरूको सम्मेलनमा सहभागी हुन स्कटल्यान्डको ग्लास्गोमा गएका थिए। उक्त भ्रमणमा भारतीय प्रधानमन्त्रीलगायत विश्व नेताहरूसँग साइडलाइन भेट गरे पनि औपचारिक भ्रमण भने हुन सकेको थिएन।
