काठमाडौँ- देशको पूर्वी तथा मध्य भू–भागमा आज मनसुनी प्रणालीको प्रभाव रहेको छ । बाँकी भू–भागमा पश्चिमी वायुको आंशिक प्रभाव रहेको जल तथा मौसम विज्ञान विभागले जनाएको छ ।
मनसुन प्रणाली अहिलेसम्म गण्डकी प्रदेशको पोखरासम्म पुगेको छ । त्यसबाट पश्चिमी भू–भागमा मनसुन फैलिन बाँकी छ । नेपालमा हिजो (बुधबार)बाट मनसुन प्रवेश गरेको हो । मौसमविद् विनु महर्जनका अनुसार अझै सुदूरपश्चिम प्रदेशसम्म मनसुन फैलिन केही दिन लाग्नेछ । “नेपालमा मनसुन प्रवेश गरेपछि नेपालभर फैलिन औसतमा पाँचदेखि सात दिन लाग्छ । तर, यो औसत समय मात्रै हो,” विनु भन्छिन्, “यो समयभन्दा केही तल वा माथि पनि हुनसक्छ देशभर मनसुनको कभरेज हुन ।”
यो वर्ष मनसुन देशभर फैलिन केही दिन ढिलो हुनसक्ने उनको भनाइ छ । अरेवियन सागरमा रहेको चक्रवातका कारण पश्चिमी वायु स्ट्रङ भएकाले मनसुन देशभर फैलिन केही समय ढिलो हुनसक्ने उनी बताउँछिन् ।
त्यसैले आज पनि देशका मध्य तथा पश्चिम तराईका भू–भागहरूमा अत्याधिक गर्मी हुने सम्भावना रहेको छ । अत्याधिक गर्मीबाट हुन सक्ने जोखिम वा क्षतिबाट बच्न आवश्यक सतर्कता अपनाउन विभागको आग्रह छ ।
मनसुन सुरु भएका भू–भागमा भने गर्मी केही कम भइसकेको छ । कोसीदेखि गण्डकी प्रदेशसम्म तापक्रम कम भएको मौसमविद् विनु बताउँछिन् । “मनसुन प्रणालीमा बाक्लो बादल लाग्ने र पानी पर्ने भएकाले तापक्रम पनि घट्ने भएकाले कम गर्मी हुन्छ,” उनी भन्छिन्, “त्यसैले मनसुन सुरु हुनुभन्दा अगाडि धेरै गर्मी हुन्छ भने मनसुन सुरु भएपछि गर्मीको महसुस कम हुन्छ ।”
