काठमाडौँ- टर्की र सिरियामा सोमबार गएको भूकम्पका कारण २१ हजारभन्दा बढीको मृत्यु भएको छ । उद्धारकर्मीहरू अहिले चिसो जाडोमा भत्किएका भवनहरूको भग्नावशेषबाट बाँचेकाहरूलाई निकाल्न जोड गरीरहेका छन्।
अधिकारीहरुका अनुसार दुबै देशमा कम्तिमा ७८,१२४ जना घाइते भएका छन्।
उद्धार टोलीहरूलाई सबैभन्दा बढी प्रभावित क्षेत्रहरूमा खटाइएको छ । हजारौँ भत्किएका भवनहरू र चिसो तापक्रममा उनीहरूले उद्धारमा कठिनाइ भोगिरहेका छन् ।
उक्त भूकम्पमा परी मृत्यु हुनेको संख्या अझै बढ्न सक्ने अनुमान गरिएको छ । विश्व स्वास्थ्य संगठनले भूकम्पबाट ती दुवै देशमा गरी दुई करोड ३० लाख मानिस प्रभावित हुने अनुमान गरेको छ ।
७.८ म्याग्निच्युडको भूकम्पको केन्द्र टर्कीको गाजियन्टेप प्रान्तको नुर्दागीबाट २३ किलोमिटर पूर्वमा २४.१ किलोमिटर गहिराइमा रहेको युनाइटेड स्टेट्स जियोलोजिकल सर्भे (युएसजीएस)ले जनाएको छ।
एस्तो भयावह प्राकृतिक प्रकोप दुई दशकयताकै सबैभन्दा घातक भूकम्पमध्येको एक रहेको बताइएकाे छ।
