काठमाण्डौं – श्रावण १५ गते खीर खाने दिनकोरुपमा प्रचलित छ । नेपाली परम्परा अनुसार विभिन्न परिकारहरु खाने बिशेष दिनहरु मध्ये आजको दिनको छुट्टै महत्व रहेको छ । नेपाल कृषिप्रधान देश भएको र बहुसंख्यक नेपाली कृषि पेसामा आश्रित भएकाले कृषकहरूले धान रोपेर सकेपछि खुसीयाली स्वरूप खीर खाने परम्परा रहँदै आएको मानिन्छ।
राष्ट्रिय दुग्ध विकास बोर्डले विगत केहि वर्ष यता आजको दिनलाई खीर दिवसको रुपमा मनाउँदै आएको छ । यस वर्ष पनि सरोकारवाला सबैलाई भेला गरि कृषि तथा पशु पन्छी विकास मत्री र सचीवको विशेष उपस्तिथिमा ‘पोषिलो खीर, स्वस्थ्य शरीर‘ भन्ने नाराका साथ दिवश मनाउने कार्यक्रम रहेको छ । नेपाल डेरी एसोसिएसनले विज्ञप्ति मार्फत आफ्ना सातै प्रदेशमा खीरको महत्त्व बुझाउने एवं खीर खुवाउने कार्यक्रमको आयोजना गरेको जानकरी गराएको छ ।
साउनमा हरियो घाँस धेरै पाइने हुनाले गाईले दुध बढि दिने हुँदा यो समयमा खीर खाने गरिएको हो भन्ने चलन पनि छ । हरेक शुभ साइतमा खीरको महत्व छ ।
असार महिनामा रोपाँइ सकेपछि साउन १५ मा कृषकहरूले तातो खीर खाएर मनाउने गरेका हुन्छन् । यस प्रकारको खानेकुरा खानाले स्वास्थ्यमा लाभ हुने जन विश्वास छ । असारभरी पानी हिलोमा खेल्दा सर्दी लाग्ने र तातो खीर खाँदा सर्दिबाट जोगीने विश्वास पनि छ । साउन महिना झरी पर्ने महिना भएकाले विभिन्न रोगबाट छुटकारा पाउनका लागि पनि दूधबाट बनेको खीर खाने गरिन्छ। रोग प्रतिरोधात्मक क्षमता बृद्दि हुने भएकाले पनि खीर खानु स्वास्थ्यकर मानिन्छ ।
नेपाल डेरी एसोसिएसनले जारी गरेको विज्ञप्तिमा खीर दिवसको महत्व तथा आजको कार्यक्रको बारेमा जानकारी गराइएको छ ।
