काठमाडौं – बीमा समितिले कृषि, पशुपन्छी तथा जडिबुटी बीमा निर्देशिका, २०७९ जारी गरेको छ । भोली देखि लागू हुनेगरी समितिले नयाँ निर्देशिका जारी गरेको हो । सरकारले आगामी वर्षको बजेटमा जडिबुटी खेतीको बीमा गर्ने व्यवस्था मिलाउने उल्लेख गरे अनुसार समितिले जडिबुटी बीमा समेत समावेश गरी कृषि, पशुपन्छी तथा जडिबुटी बीमा निर्देशिका, २०७९ जारी गरेकोबताइएको छ ।
निर्देशिकामा बीमा कम्पनीहरूले आफूलाई तोकिएका जिल्लामा कृषि, पशुपन्छी तथा जडिबुटीको बीमा व्यवसाय गर्नुपर्ने, जिल्लास्थित कृषि ज्ञान केन्द्र वा कृषि तथा पशु सेवा कार्यालय नजिकको स्थानमा बीमकले शाखा कार्यालय खोल्नुपर्ने, बीमक आफैँले तयार गरी समितिको स्वीकृतिमा जारी गरेको बीमालेखको हकमा अनुदान प्राप्त नहुनेलगायतको व्यवस्था छ । त्यस्तै, बीमकले अनुदान प्राप्त नहुने बीमालेखको हकमा छोटो अवधिका लागि बीमालेख जारी गर्न सक्ने र कृषि, पशुपन्छी तथा जडिबुटी बीमा सामूहिक रूपमा गर्न सकिने व्यवस्था रहेको छ ।
पशुपन्छी बीमालेखमा उल्लेख भएको हकमा बीमालेख बमोजिम र अन्यको हकमा बजार मूल्य, बीजक मूल्य तथा स्थानीय चलनचल्तीको मूल्यलाई आधार लिई आपसी सहमतिका आधारमा बीमाङ्क कायम गर्नुपर्ने व्यवस्था निर्देशिकामा गरिएको छ ।
बालीहरूको लागतका आधारमा बीमाङ्क रकम कायम गर्दा मुलुकका सातै प्रदेशका भौगोलिक क्षेत्रहरूमा लगाइने बालीहरूको खेती गर्दा लाग्ने लागत खर्च तथा उत्पादित वस्तुहरूको कृषक थलोमूल्य बीमा समितिद्वारा तयार नहुन्जेल कृषि तथा पशुपन्छी विकास मन्त्रालयले उपलब्ध गराएको (साविकको बजार अनुसन्धान तथा तथ्याङ्क कार्यक्रम) लागत अनुमानका आधारमा बीमाङ्क कायम गर्नुपर्ने निर्देशिकामा उल्लेख छ ।
