एजेन्सी – जापानका पूर्वप्रधानमन्त्री शिन्जो आबेमाथि शुक्रवार सार्वजनिक कार्यक्रममा गोली चलेपछि उनको स्वास्थ्य अवस्था अत्यन्तै चिन्ताजनक रहेको बताइएको छ । स्थानीय सञ्चारमाध्यमहरूका अनुसार, आबेको शरीरका प्रमुख अंगहरूले काम गरिरहेका छैनन् ।
देशको पश्चिमी क्षेत्रमा रहेको नारामा स्थानीय समयअनुसार बिहान साढे ११ बजे आबेमाथि गोली प्रहार गरिएको थियो ।गोली हान्ने व्यक्तिलाई प्रहरीले नियन्त्रणमा लिएको मन्त्रिपरिषद्का मुख्यसचिव हिरोकाजु माचुनोले बताए ।
एनएचके टीभी र क्योदो समाचार संस्थाले आबेको कार्डियोरेस्पिरेटोरी अरेस्ट अर्थात् मुटु र श्वासप्रश्वास बन्द भएको खबर दिएका छन् । जापानमा मृत्युको आधिकारिक पुष्टि हुनुअघि प्रायः यस शब्दावलीको प्रयोग गर्ने गरिन्छ । चिकित्सकहरूले पनि आबे निको हुने विषयमा निराश कुरा गरेका छन् ।
जापानमा हिंस्रक अपराध अत्यन्तै कम हुन्छन् र व्यक्तिले बन्दूक राख्न पनि निकै कडाइ गरिएको छ । यस्तो अवस्थामा पूर्वप्रधानमन्त्रीमाथि गरिएको आक्रमणले धेरैलाई स्तब्ध बनाएको छ ।
आइतवार हुन लागेको माथिल्लो सदनको निर्वाचनअघि चुनावी भाषण गरिरहेको बेलामा आबेमाथि गोली प्रहार गरिएको थियो । उनले सम्बोधन गरिरहेको बेलामा एकजना पछाडिबाट आएर गोली हानेका थिए । गोली लागेर उनी ढलेका थिए र उनको घाँटीबाट रगत चुहिएको थियो ।
