काठमाडौं – बंगलादेशको चटगाउँको सीताकुण्डमा शनिबार राति ठूलो दुर्घटना भएको छ । सिताकुण्ड उपजिल्लामा रहेको एक निजी इनल्याण्ड कन्टेनर डिपो (आईसीडी) मा आगलागी हुँदा ३४ जनाको मृत्यु भएको छ भने ४५० भन्दा बढी घाइते भएका छन् ।
चटगाउँका प्रहरी उपरीक्षक एसएम रसिदुल हकले स्थानीय मिडिया कालेर कान्थोलाई ३४ जनाको मृत्यु भएको पुष्टि गरेका छन् । शव शवगृहमा राखिएको छ ।
रेड क्रिसेन्ट युथ चटगाउँका स्वास्थ्य तथा सेवा विभागका प्रमुख इस्ताकुल इस्लामले भने, “यो घटनामा ४५० जनाभन्दा बढी घाइते भएका छन्, जसमध्ये कम्तीमा ३५० सिएमसीएचमा छन्। अन्य अस्पतालमा मृत्यु हुनेको संख्या बढी हुनसक्छ।”
कन्टेनर डिपोमा राति ९ बजेतिर आगलागी भएको प्रहरी नायब निरीक्षक (एसआई) नुरुल आलमले बताए । फायर सर्भिस युनिटले आगो निभाउने क्रममा विष्फोट भयो र त्यसपछि आगो फैलियो । कन्टेनर डिपोमा रहेको केमिकलका कारण आगलागी भएको प्रारम्भिक आशंका गरिएको एसआई नुरुलले बताए ।
अर्कोतर्फ बिएम कन्टेनर डिपोको लोडिङ प्वाइन्टभित्र राति करिब ९ बजे आगलागी भएको प्रहरी, दमकल र स्थानीय स्रोतले बताएको छ । राति करिब पौने १२ बजे एउटा कन्टेनरमा केमिकल भएकोले ठूलो विष्फोट भयो र एक कन्टेनरबाट अर्को कन्टेनरमा आगो फैलियो ।
चटगाउँको फायर सर्भिस तथा सिभिल डिफेन्सका सहायक निर्देशक मोहम्मद फारुक हुसेन सिकदारले करिब १९ दमकलले आगो निभाउने प्रयास गरिरहेको बताए । घटनास्थलमा ६ वटा एम्बुलेन्स पनि रहेको उनले बताए । बीएम कन्टेनर डिपो सन् २०११ को मेदेखि काम गरिरहेको छ ।
