काठमाण्डौं -बैसाख ५
विलासिताका वस्तु आयातका लागि प्रतीतपत्र (एलसी) नखोल्ने नेपाल बैंकर एसोसिएसनको निर्णयले केराको भाउ अचाक्ली बढेको छ । केरा विलासिताको वस्तु नभए पनि आयात गर्दा शतप्रतिशत एलसी खोल्नुपर्ने नियमले यसको आयातमा अवरोध भएको हो । विगतमा एलसी खोलिसकेका व्यवसायीले मात्रै अहिले केरा आयात गरिरहेका छन् ।
मुलुकभर १६ हजार ६ सय ९९ हेक्टरमा केरा खेती हुने कृषि तथा पशुपन्छी विकास मन्त्रालयको तथ्यांक छ । वार्षिक २ लाख ५४ हजार १ सय ६१ टन केरा उत्पादन हुन्छ । तर उक्त परिमाणले ३/४ महिना पनि धान्दैन । त्यसबाहेकका महिनामा आयातमै भर पर्नुपर्ने अवस्था छ ।
फलफूल जस्तै कागतीको मूल्य पनि अचाक्ली बढेको छ । खुद्रामा कागतीको साइजअनुसार एक गोटाकै २० देखि २५ रुपैयाँसम्म पर्ने व्यापारीहरू बताउँछन् । ‘स्वदेशमा पर्याप्त उत्पादन छैन, पछिल्लो समय भारतमा पनि भाउ बढेको छ , जसले गर्दा यहाँ महँगो परेको छ ।प्रतिदिन भान्सामा प्रयोग हुने हरियो तरकारीको मूल्य साढे ५ सय प्रतिशतसम्म बढेको छ । हरियो साग, काउली, मटरकोसा, सिमी, प्याज, खुर्सानीलगायतको मूल्य अत्यधिक बढेको तथ्यांक छ ।
नेपालमा अपुग तरकारी भारत, चीन र बंगलादेशबाट आयात गरिन्छ । कालीमाटी तरकारी बजारले उपत्यकाको ७० प्रतिशत माग धान्ने गरेकाे छ । बजार भाउ अचाक्ली बढिरहँदा बजार अनुगमन गर्ने दायित्व पाएका सरकारी निकाय भने मौन छन् । माग र आपूर्तिको सन्तुलन नमिल्दा बजार भाउ बढेको भन्दै उद्योग वाणिज्य तथा आपूर्ति मन्त्रालयले पनि देख्या नदेखै गर्छ ।
